ސްޕެޝަލް އޮލިމްޕިކްސް މޯލްޑިވްސް (އެސް އޯ މޯލްޑިވްސް) ގެ ދެވަނަ އެތުލެޓިކްސް ކޮމްޕެޓިޝަންގައި ބައިވެރިވާން ފުރުސަތު ހުޅުވާލައިފި އެވެ.

އެސްއޯ މޯލްޑިވްސް އިން ބުނި ގޮތުގައި ކޮމްޕެޓިޝަން އޮންނާނީ 22 އޯގަސްޓް އިން 24 އަށް ހުޅުމާލެ ސިންތެޓިކް ޓްރެކްގައެވެ. މުބާރާތުގައި ބައިވެރިވެވޭނީ 1 އޯގަސްޓް 2025 ގެ ކުރިން އެސް އޯ މޯލްޑިވްސްގައި ރަޖިސްޓްރީ ވެފައިވާ އެތުލީޓުންނަށެވެ.

ނަމަވެސް ޝާމިލުކުރަނިވި މުޖްމައުއެއް ގާއިމުކުރަމަށް ކުރެވޭ މަސައްކަތެއްގެ ގޮތުން މިއަހަރު 100*4 މީޓަރު ރިލޭގައި ބައިވެރި ވުމުގެ ފުރުސަތު ކްލަބު ތަކަށް ވެސް ވަނީ ހުޅުވާލާފައެވެ.

މުބާރާތުގައި ބައިވެރިވެވޭނެ އުމުރުފުރާތަކަކީ 11 އަހަރުން ދަށް 11 އަހަރުން މައްޗެވެ.

ސްޕެޝަލް އޮލިމްޕިކްސް މޯލްޑިވްސްގެ ދެވަނަ އެތުލެޓިކްސް ކޮމްޕެޓިޝަނަށް ވަނީ ހުޅުވާލާފައި

މި މުބާރާތުގައި ބައިވެރު ވުމަށް 14 އޯގަސްޓް 2025 ގެ ކުރިން ފޯމު ހުށަހަޅަން ޖެހެ އެވެ. ފޯމުގެ ލިންކް، އެސް އޯ މޯލްޑިވްސްގެ ފޭސްބުކް އަދި އިންސްޓަގްރާމް އަދި އެކްސް އިން ފެންނަން ހުންނާނެ އެވެ.

މި މުބާރާތުގައި ބައިވެރިވުމަކަށް ނުވަތަ އެއްވެސް ކަމަކަށް އެއްވެސް ފީއެއް ނުނަގާނެ ކަމަށާ އަދި ލާރީގެ އެއްވެސް މުއާމަލާތެއް ނުކުރާނެތީ އެކަމަށް ސަމާލުވާން އެސްއޯ މޯލްޑިވްސް އިން ވަނީ އެދިފަ އެވެ.

މިދިޔަ އަހަރު މި މުބާރާތު ގައި ފިރިހެން 46 އެތުލީޓުންނާއި އަންހެން 15 އެތުލީޓުން ވަނީ ބައިވެރިވެފަ އެވެ.

ސިކުނޑީގެ ނުކުޅެދުންތެރިކަން ހުންނަ ފަރާތްތަކަށް ދުޅަހެޔޮ ސިއްހަތެއް ހޯދައިދިނުމަށް މަސައްކަތް ކުރުމަށް ސަރުކާރުން އުފައްދާފައިވާ އެ މުއައްސަސާ އިން ދަނީ ރާއްޖޭގެ އެކި ކަންކޮޅުތަކުގައި ތަފާތު ހަރަކާތްތައް މެދު ނުކެނޑި ހިންގަމުންނެވެ.