ޕާކިސްތާނާއި އިންޑިއާ އާ ދެޤައުމުގެ ދެމެދުގައި މިއަހަރުގެ މެއިމަހު ހިނގާދިޔަ ކުރިމަތިލުންތަކާ ގުޅިގެން ވައިގެ ސަރަހައްދު ބަންދުކުރުމުން ޕާކިސްތާނަށް 4 ބިލިއަނަށް ވުރެ ގިނަ ރުފީގެ ގެއްލުން ލިބިއްޖެއެވެ.

ޕާކިސްތާނުގެ ބައެއް މީޑިއާތަކުން ބުނެފައިވަނީ އޭޕްރިލްމަހު ކަޝްމީރުގެ އިންޑިއާ ކޮންޓްރޯލްކުރާ ސަރަހައްދަށް ހަނގުރާމަވެރި ޖަމާއަތަކުންދިން ހަމަލާތަކާ ގުޅިގެން ހިނގާދިޔަ ކަންތައްތަކުގައި ވައިގެ ސަރަހައްދު ބަންދުކުރުމުން ލިބެމުންއައި އާމްދަނީގެ ބޮޑުބައެއް ގެއްލިފައިވާކަމަށެވެ. އެގޮތުން އޭޕްރިލްމަހުގެ 24 ހުން ފެށިގެން ޖޫންމަހުގެ 30 ވަނަ ދުވަހުގެ ނިޔަލަށް ލިބުނު ގެއްލުން 4.1 ބިލިއަން ރުޕީ ނުވަތަ 14 މިލިއަން ޑޮލަރަށްވުރެ ބޮޑުކަމަށް ޕާކިސްތާނުގެ އެއާޕޯޓްސް އޮތޯރިޓީން ބުނެފައިވާކަމަށް މީޑިއާތަކުން ވަނީ ރިޕޯޓްކޮށްފައެވެ.

ޕާކިސްތާނުގެ މީޑިއާއިން ބުނެފައިވަނީ ކިތަންމެ ބޮޑު ގެއްލުމެއް ލިބުނު ނަމަވެސް ޤައުމުގެ ސިޔާދަތާ މިނިވަންކަމުގެ ހައްޤުގައި އަޅާ މިފަދަ ފިޔަވަޅުތަކުގެ އަގު މާބޮޑުވާނޭކަމަށެވެ. 

2019 ވަނަ އަހަރު ޕާކިސްތާނާ އިންޑިއާ ދެޤައުމުގެ ދެމެދުގައި ހިނގާދިޔަ ކަންތައްތަކަށްފަހު ދެ ޤައުމުގެ ވައިގެ ސަރަހައްދު އެއްބަޔަކު އަނެއް ބަޔަކަށް ބޭނުންކުރުން މަނާކުރިއެވެ. އެފަހަރުވެސް ޕާކިސްތާނަށް 7.6 ބިލިއަން ރުޕީސްގެ ގެއްލުން ލިބުނެވެ.

މެއިމަހު އިންޑިއާ އާއި ޕާކިސްތާން ދެ ޤައުމުން ވަނީ ވައިގެ ހަަމަލާތައް ބަދަލުކޮށްފައެވެ. މެއިމަހުގެ 8 ވަނަ ދުވަހު ދެ ޤައުމުން ފެށި ހަމަލާ ބަދަލުކުރުން ހުއްޓާލާފައިވަނީ 11 ވަނަ ދުވަހެވެ. މި ހަމަލާތަކުގައި ދެ ޤައުމުންވެސް ވަނީ ޑްރޯން އަދި ފައިޓަރޖެޓް ބޭނުންކޮށްފައެވެ.