ޣައްޒާގެ ހިސޯރު ނައްތާލަން ގޮވާލާ ދިވެހީންގެ ބޮޑު އެއްވުމެއް
ފަލަސްތީނުގެ ޣައްޒާގެ ރައްޔިތުންގެ ހައްޤުގައި ތެދުވެ ދިވެހީން ބޮޑު އެއްވުމެއް މިއަދު ބާއްވައިފި އެވެ.
ފަލަސްތީނުގެ ދިިފާއުގައި މުޅި ދުނިޔޭގައިވެސް އެންމެ ހަރު އަޑަކީ ދިވެހީންގެ އަޑެވެ. އެ ގޮތުން ދިވެހީން މިއަދު ވަނީ މާލޭގެ މާފަންނު ސްޓޭޑިއަމް ސަރަހައްދުގައި ބޮޑު އެއްވުމެއް ކުރިއަށް ގެންގޮސް ފަލަސްތީނުގެ ހައްގުގައި އަޑުއުފުލާފަ އެވެ.
މިއީ ސުލްހައަށް މަސައްކަތްކުރާ ބައިނަލްއަޤްވާމީ އެކްޓިވިސްޓުންގެ ޖަމާއަތެއްކަމަށްވާ "ގްލޯބަލް ސުމޫދް ފްލޮޓިއްލާ" ހަރަކާތުގެ ދަށުން ކުރިއަށްގެންދިޔަ އެއްވުމެވެ.
ޣައްޒާގެ ހިސޯރު ނައްތާލަން ގޮވާލާ ދިވެހީންގެ ބޮޑު އެއްވުމެއް -- ފޮޓޯ: ވޮއިސް
އިންޓަރނޭޝަނަލް އެއިޑް ކެމްޕެއިން، އައިއޭސީ އިސްވެ އޮވެ، ރާއްޖޭގެ މަދަނީ ޖަމިއްޔާ ޖަމާއަތްތަކާއި، މުއައްސަސާތަކާއި، ކުންފުނިތަކުގެ އިތުރުން އާއްމުން ބައިވެރިވާ ހާއްސަ ސްޓިރިއަރިން ކޮމިޓީއަކުން އިންތިޒާމު ކުރި މިއަދުގެ އެއްވުމުގައި އެތައް ސަތޭކަ ބަޔަކު ބައިވެރިވި އެވެ. އެ މީހުން ތިބީ ފަލަސްތީނަށް ތާއީދު އޮތްކަން ދައްކައިދޭ ޓީސާޓް ލައިގެންނެވެ. އަދި ފަލަސްތީނުގެ ދިދަ އާއި އެ ގައުމުގެ ހައްގުގައި އެކި ޝުއޫރުތައް ލިޔެފައިވާ ބެނާތަކާއި ޕޯސްޓަރުތައް ހިފައިގެންނެވެ.
ރާއްޖޭގެ ވަރަށް ގިނަ ޓީވީ ޗެނެލްތަކުން ވަގުތުން ގެނެސް ދިން މި އެއްވުމުގައި ދީނީ އިލްމުވެރީންނާއި ޖަމިއްޔާ ޖަމާއަތްތަކުގެ އިސް ބޭފުޅުންނާއި ފާހަގަކޮށްލެވޭ އެހެނިހެން ބޭފުޅުން ވަނީ ވާހަކަ ދައްކަވާފަ އެވެ.
ޣައްޒާގެ ހިސޯރު ނައްތާލަން ގޮވާލާ ދިވެހީންގެ ބޮޑު އެއްވުމެއް -- ފޮޓޯ: ވޮއިސް
މިއަދުގެ މި އެއްވުން ކުރިއަށްދިޔަ ވަގުތު އަތޮޅުތެރޭގެ އެެކި ރަށްރަށުގައިވެސް ވަނީ އެއްވުންތައް ކުރިއަށް ގެންގޮސްފަ އެވެ.
އިސްރާއީލްގެ އިސްތިއުމާރީ ސިފައިން ޢައްޒާ ހިސޯރުކޮށް އިންސާނިއްޔަތާ ހިލާފަށް ހިންގަމުންގެންދާ ޖަރީމާތަކާ ދެކޮޅަށް ބައިނަލްއަގްވާމީ 44 ޤައުމެއް ގުޅިގެން ފަށާފައިވާ "ގްލޯބަލް ސުމޫދް ފްލޮޓިއްލާ" ހަރަކާތުގެ ދަށުން ރާއްޖޭގައި މީގެ ކުރިންވެސް ބައެއް ހަރަކާތްތައް ވަނީ ކުރިއަށް ގެންގޮސްފަ އެވެ. މީގެ ތެރޭގައި މިފަހުން މޫދު އަޑީގައި ޑައިވަރުން ހިންގި ހަރަކާތް ފާހަގަކޮށްލެވެ އެވެ.
Advertisement
This content is created and paid for by advertisers and does not involve Voice Journalists
