ދިވެހިރާއްޖޭގައި މިއޮތީ ޔުނިޓަރީ ދައުލަތެއް ކަމަށާއި، ލާމަރުކަޒީ ޤާނޫނު އޮންނަން ވާނީ ޔުނިޓަރީ ދައުލަތަކުން ކަމެއް ފުޅާކުރެވޭ މިންވަރަށް މާމިނގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.

ލާމަރުކަޒީ ޤާނޫނަށް ސަރުކާރުގެ ފަރާތުން ގެނައި އިސްލާހަށް އިދިކޮޅު ފަރާތްތަކުން ފާޑުކިޔަމުންދަނިކޮށް ގާސިމް ނެރުއްވި ބަޔާނެއްގައި ވިދާޅުވެފައިވަނީ، ލާމަރުކަޒީ ޤާނޫނަށް ގެނެވުނީ ވަރށް މުހިއްމު އިސްލާހެއްކަމަށެވެ. އަދި މިއީ މިއަދަށް ނުހަނު ބޭނުންވެފައިވާ އިސްލާހެއްކަމަށް ގާސިމް ވިދާޅުވިއެވެ.

ގާސިލް ވިދާޅުވީ ރާއްޖޭގެ ޤާނޫނު އަސާސީގައި ބަޔާންކޮށްފައިވަނީ ރާއްޖެއަކީ ޔުނިޓަރީ ދައުލަތެއްކަމަށާއި މިއީ ފެޑެރަލް ދައުލަތެއް ނޫންކަމަށެވެ. އެހެންކަމުން ލާމަރުކަޒީ ޤާނޫނުވެސް އޮންނަންވާނީ ޔުނިޓަރީ ދައުލަތަކުން ކަމެއް ފުޅާކުރެވޭނެ މިންވަރަކަށް ކަމަށާއި، އެ ހުދޫދުގެ ތެރެއިން ޔުނިޓަރީ ދައުލަތެއްގެ ވެރިކަން ހިންގުމުގެ ބާރުތަކާއި ފްރޭމްވަރކާއި ފުށުއަރާގޮތަށް އެއްވެސް ޤާނޫނެއް ހެދިގެން ނުވާނޭކަމަށް ގާސިމް ވިދާޅުވިއެވެ.

ގާސިމް ވިދާޅުވީ ލާމަރުކަޒީ ނިޒާމެއް ވޫޖޫދަށް ގެނެސް 14 އަހަރުވެގެން ދިޔައިރު އެ ޤާނޫނާއެކު ބައެއް ފަރާތްތަކުން ފެޑެރަލް ވިސްނުން ގެންގުޅޭ ކަމަށާއި، އާއްމުކޮށް ސަރުކާރާ އިދިކޮޅުގައި އޮންނަ ފަރާތްތަކުން އެފަދަ ވާހަކަތައް ޕްރޮމޯޓްވެސް ކުރާކަމަށެވެ.

ލާމަރުކަޒީ ނިޒާމް އިސްލާހްކުރުމަށް ސަރުކާރުން ގެނައި އިސްލާހްތަކަކީ ގެންނަންޖެހޭ އިސްލާހްތަކެއްކަން ގާސިމް ފާހަގަކުރެއްވިއެވެ. ސަރުކާރުގެ މާލީއްޔަތު ތަން ނުދޭ މިންވަރަށް އިތުރު މަގާމުތައް އުފެއްދުމުގެ ބާރު ޤާނޫނަކުން ކައުްނސިލަރުންނަށް ލިބިދީފައި އޮވެގެން ނުވާނޭކަން ފާހަގަކުރައްވައި ގާސިމް ވިދާޅުވީ، ސަރުކާރުން ލާމަރުކަޒީ ޤާނޫނަށް ގެނައި އިސްލާހްގެ ފުރިހަމަ ފައިދާކުރާނީ ސަރުކާރަށްވުރެ ބޮޑަށް ރައްޔިތުންނަށް ކަމަށެވެ.

ސަރުކާރުން ލާމަރުކަޒީ ނިޒާމަށް ގެނައި އިސްލާހަށް އިދިކޮޅުން ފާޑުކިޔަމުންދާއިރު، އެފަރާތްތަކުން ބުނެފައިވަނީ މިއީ ރައްޔިތުްނގެ ބާރު ކަނޑުވާލުމަށް ސަރުކާރުން ކުރި ކަމެއްކަމަށެވެ. މި ސަރުކާރުން ގެންނަ އެފަދަ ބަދަލުތައް އެމްޑީޕީގެ ވެރިކަމެއްގައި ބަދަލުކުރާނޭކަމަށް އެޕާޓީން ވަނީ ބުނެފައެވެ.