އެއްބަސްވުން ބާތިލްކުރި އަތޮޅުތަކުގެ 55 ކައުންސިލް އިމާރާތް އެޅުމުެގ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން (އާރު.ސީ.ސީ) އާ ހަވާލުކޮށްފިއެވެ

 ސިޓީތަކާއި އިދާރީ ދައިރާތައް ހިންގުމާ ބެހޭ ވުޒާރާއިން އެކްސްގައި ކުރި ޕޯސްޓެއްގައި ބުނެފައިވަނީ، ކޮންޓްރެކްޓަރ ފައިނޭންސް އުސޫލުން ރާއްޖޭގެ 55 ރަށެއްގައި ކައުންސިލް ޢިމާރާތްކުރުމުގެ މަޝްރޫޢުގެ މަސައްކަތް ކުރުމަށް އާރުސީސީއާއެކު އެއްބަސްވުމުގައި ސޮއިކޮށްފައިވާކަމަށެވެ. މި މަސައްކަތްތައް ނިންމުމަށް އެއްބަސްވެފައިވަނީ އަހަރުދުވަހުގެ ތެރޭގައި ނިންމާގޮތަށެވެ.

އެ ވުޒާރާއިްނ ބުނެފައިވަނީ، މި ޕްރޮޖެކްޓްގެ ޢަމަލީ މަސައްކަތް މިހިނގާ އޮގަސްޓްމަހުގެތެރޭގައި ފެށޭނޭކަމަށާއި، މި ޕްރޮޖެކްޓްގައި ކައުންސިލަށް ބޭނުންވާ ފަރުނީޗަރާއި ވަށާފާރު ރޭނުމުގެ މަސައްކަތްވެސް ހިމެނޭކަމަށެވެ. 

އަތޮޅުތަކުގެ 55 ކައުންސިލް އިމާރާތް އެޅުމަށްޓަކައި މެލޭޝިޔާގެ ހެކްސްޓާ ކުންފުންޏާއެކު ގާއިމްކޮށްފައިވާ އެއްބަސްވުން ބާތިލްކުރަންޖެހުނީ، ކައުންސިލްތަކުން ހުށަހެޅި ބަދަލުތައް އެކުންފުނިން ބަލައިނުގަތުމުން ކަމަށް ސިޓީތަކާއި އިދާރީ ދައިރާތައް ހިންގުމާ ބެހޭ ވަޒީރު ޢާދަމް ޝަރީފް އުމަރު ވަނީ ވިދާޅުވެފައެވެ. 

ސަރުކާރުން މެލޭޝިއާގެ އެ ކުންފުންޏާ 55 ކައުންސިލް އިދާރާގެ އިމާރާތްތައް އެޅުމުގެ މަސައްކަތް ހަވާލުކުރީ ޖެނުއަރީމަހުގެ ތެރޭގައެވެ. މެލޭޝިއާގެ ކުންފުންޏާއެކު ކައުންސިލް އިދާރާތައް އެޅުމުގެ އެއްބަސްވުން އުވާލިއިރު، ސަރުކާރުން ވަނީ ޗައިނާ އާއެކު 50 ކައުންސިލް އިދާރާ އެޅުމަށްޓަކައި ލެޓާއޮފްއެކްސްޗޭންޖުގައި މިއަހަރުގެ މެއިމަހު ސޮއިކޮށްފައެވެ