މަސްވެރިކަމަށް ޒުވާނުންގެ ޝައުޤުވެރި ކުރުވުމާއި، އަދި ދާއިރާއަށް ޒުވާނުން އަހުލުވެރިކުރުމަށް ހިންގާ ޕްރޮގުރާމުގައި ބައިވެރިވުމުގެ ފުރުސަތު މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ހުޅުވާލައިފިއެވެ.

މި ޕްރޮގުރާމަކީ ވޯލްޑް ބޭންކުގެ އެހީގައި ކުރިޔަށްގެންދާ ޓްރާންސްފޯމިންގ ފިޝަރީޒް ސެކްޓަރ އިން ސައުތު-ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓެކެވެ. މި ޕޮރޮޖެކްޓުގެ ބޭނުމަކީ ޒުވާނުންގެ މެދުގައި މަސްވެރިކަމަށް ޝައުޤުވެރިކަން އުފައްދައި، މަސްވެރިކަމާއި މަސްވެރިކަމުގެ ދާއިރާއާއި ގުޅޭ މަސައްކަތްތަކާއި މަސްވެރިކަމާއި ގުޅޭ ތަމްރީނުތަކާއި ހުނަރުތައް ހޯދައިދިނުމުގެ ފުރުސަތުތައް ފަހިކޮށްދިނުމެވެ.

މި ޕްރޮގްރާމް ކުރިއަށް ގެންދަން ނިންމާފައި ވަނީ މި އަހަރުގެ ސެޕްޓެމްބަރ އިން ނޮވެމްބަރ އަށް ޖުމްލަ 3 މަސް ދުވަހަށެވެ. މި ޕްރޮގްރާމުން ފުރުސަތު ދިނުމަށް ނިންމާފައި ވަނީ މުޅިން އަލަށް މަސްވެރިކަމަށް ނުކުންނަން ބޭނުންވާ 5 ފަރާތަކަށެވެ.

މަސްވެރިކަމާ ބެހޭ ވުޒާރާއިން ބުނީ މި ޕްރޮގުރާމުގައި މަސްވެރިކަމާއި ބެހޭ ތަފާތު ފަންނީ މައުލޫމާތު އަދި އަމަލީ ގޮތުން ހަރަކާތްތެރިވުމުގެ ފުރުސަތު ބައިވެރިންނަށް ފަހިކޮށްދިނުމަށް ހަމަޖެހިފައިވާކަމަށެވެ. އެގޮތުން ދޮށީގެ މަސްވެރިކަން ކުރަމުން އަންނަ ދޯންޏެއްގައި އަމަލީ ގޮތުން މަސްވެރިކަމުގައި ހަރަކާތްތެރިވެ މަސްވެރިކަން ކުރާ ގޮތުގެ ތަމްރީނާއި ހުނަރު ރާއްޖޭގެ އެންމެ ފުންނާބުއުސް ކެޔޮޅުންގެ ފަރާތުން އުނގެނި ދަސްކުރުމުގެ ފުރުސަތު މިޕްރޮގްރާމްގެ ބައިވެރިންނަށް ލިބޭނޭކަމަށް އެ ވުޒާރާއިން ބުންޏެވެ.

މީހަކު ބޭނި މަހެއް ދައްކާލަނީ ފޮޓޯ : ވޮއިސް

މި ޕްރޮގްރާމުގައި ބައިވެރިވާން ބޭނުންވާ ފަރާތްތަކުގައި ހުންނަން ޖެހޭނޭ ޝަރުތުތަކަކީ މަސްވެރިކަމުގެ ސިނާއަތުގައި ހަރާކާތްތެރިވުމަށް ޝައުގުވެރިވާ ފަރާތަކަށް ވުން ހިމެނެއެވެ. އަދި އުމުރުން 24 އަހަރުން ދަށުގެ ފަރާތަކަށް ވުމާއި، މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ މަސްވެރިންގެ ދަފްތަރުގައި މިހާރު ހިމެނިފައިވާ ފަރާތަކަށް ނުވުން ހިމެނެއެވެ.

މި ޕްރޮގުރާމުގައި ބައިވެރިވާން ބޭނުންވާ ފަރާތްތަކުން އެކަމަށް އެދި ހުށަހަޅާ ފޯމު ފުރިހަމަ ކުރެއްވުމަށް ފަހު މި މަހުގެ 27 ވަނަ ދުވަހުގެ ކުރިން ހުށަހެޅުމަށް މިނިސްޓްރީނަ ވަނީ އެދިފައެވެ.