ޔޫތު އެޑްވައިޒަރީ ބޯޑުން މާހިލް އިސްތިއުފާ ދީފި
ރައީސުލްޖުމްހޫރިއްޔާއަށް ލަފާ އަރުވާ ޔޫތު އެޑްވައިޒަރީ ބޯޑުން އަބްދުالله މާހިލް ޝަހީމް އިސްތިއުފާ ދީފި އެވެ.
މާހިލް އަކީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ ދޮށީ ދަރިކަލުންނެވެ. އޭނާ އެ މަގާމުން އިސްތިއުފާ ދީފައިވާކަން ހާމަކޮށް މިއަދު ވަނީ ރައީސަށް ސިޓީ ފޮނުވާފަ އެވެ.
ޔޫތު އެޑްވައިޒަރީ ބޯޑުން މާހިލް އިސްތިއުފާ ދީފައި ވަނީ މެލޭޝިޔާ އިން އޭނާ ރާއްޖެ އައިތަނުން ހުއްޓުވާ ބަލާ ފާސްކުރިއިރު ގައިގައި ބަނދެގެން ވޭޕްގެ ސާމާނު އެތެރެކުރި ކަމަށް ބުނެ ނޫސްތަކުގައި ވަނީ ރިޕޯޓް ކޮށްފައި ވަނިކޮށެވެ. އެތަކެތި އެތެރެކުރީ ގައިގައި ބަނދެގެންނާއި ލަގެޖްގައި ކަމަށް ވެސް ބުނެފައިވެ އެވެ.
ރިޕޯޓްތައް ބުނާގޮތުން 118 ވޭޕް ސްޓިކް މާހިލް އެތެރެކުރަން އުޅުނެވެ. އަދި މިލިއަނަކަށް ވުރެ ގިނަ ރުފިޔާ އިން އޭނާ ވަނީ ޖޫރިމަނާ ކޮށްފަ އެވެ.
އެ ވާހަކަތަކާއި ގުޅޭގޮތުން މިނިސްޓަރު ޝަހީމް ވަނީ އެކްސްގައި ޕޯސްޓެއް ކުރައްވާފަ އެވެ. ވިދާޅުވީ ގައިގައި ބަނދެގެން ވޭޕް ސާމާނުތަކެއް އެތެރެކުރި ކަމަށް ބުނެ ހަގީގަތާއި ހިލާފު ވާހަކަތަކެއް ފެތުރުމަކީ ވަރަށް ދެރަ ކަމެއް ކަމަށެވެ. އަދި އޭނާގެ ދަރިފުޅު މާހިލް އަކީ މެލޭޝިޔާގެ އެމްބަސީގައި ވަޒީފާގައި ހުރި މީހެއް ނޫން ކަަމަށްވެސް ވިދާޅުވި އެވެ.
"ހަބަރުތައް ރަނގަޅު ކުރުން އެދެން," ގޯސްކޮށް ލިޔެފައިވާ ހަބަރުތައް އިސްލާހު ކުރުމަށް އެދި މިނިސްޓަރު ޝަހީމް ލިޔުއްވާފައިވެ އެވެ.
މިނިސްޓަރު ޝަހީމް ދޮގުކުރި ރިޕޯޓްގައި ބުނާ ގޮތުން މާހިލް ހުރީ އެމްބަސީގެ ވަޒީފާއެއްގަ އެވެ. މުސާރައާ އެލަވަންސްތަކާއެކު ލައްކައެއްހާ ރުފިޔާ ލިބޭ ކަަމަށެވެ. ނަމަވެސް މިނިސްޓަރު ޝަހީމް ކުރީން ވެސް ވަނީ އެ ވާހަކަ ދޮގު ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
