ރައީސް ޑރ.މުހައްމަދު މުއިއްޒު ސަރުކާރުގެ އެންމެ ބިޔަ މަޝްރޫޢުކަމަށްވާ ރަސްމާލެ ހިއްކުން އަވަސްކުރުމުގެ ގޮތުން އިތުރުން ކުންފުންޏަކުން އެ މަޝްރޫޢުގެ ބިން ހިއްކުމުެގ މަސައްކަތް މި ހަފްތާގެ ތެރޭގައި ފަށާނޭކަމަށް ހައުސިން ޑިވެލޮޕްމަންޓް ކޯޕަރޭޝަނުން ބުނެފިއެވެ.

އެޗްޑީސީން މިއަދު ވަނީ ރަސްމާލެ ހިއްކުމުގެ މަސައްކަތް ކުރިއަށްދާގޮތް ނޫސްވެރިންނަށް ދައްކާލައި މަޝްރޫޢުގެ މަސައްކަތް ކުރިއަށްދާގޮތުގެ މައުލޫމާތު ހިއްސާކޮށްފައެވެ. އެޗްޑީސީން ބުނީ ރަސްމާލެ ހިއްކުން އަވަސްކުރުމުގެ ގޮތުން އިތުރު ޕާޓިއެއް ރާއްޖެ ގެނެސްފައިވާަކަމަށާއި، ހިއްކުމަށް ގެނައި ބޯޓު މިހާރު އޮތީ ކަސްޓަމްސްއިން ކްލިއާ ކުރުމުގެ މަރުހަލާގައިކަމަށެވެ. އެގޮތުން ކްލިއާވުމަށްފަހު މިހަފްތާގެ ތެރޭގައި ރަސްމާލެ ހިއްކުމުގެ މަސައްކަތް ފަށާނޭކަމަށް އެޗްޑީސީން ވަނީ ބުނެފައެވެ. އެކުންފުނިން 264 ހެކްތަރު ހިއްކުމަށް ވަނީ ހަމަޖެހިފައެވެ.

ރަސްމާލޭގެ ބިން ހިއްކުމުގެ މަސައްކަތް މިހާތަނަށް ކުރިއަށް ގޮސްފައިވާ ހިސާބަށް ބަލާއިރު، މޯހަން މުތާ އެކްސްޕޯރޓްސް ޕްރައިވެޓް ލިމިޑެޑާ ހަވާލުކޮށްފައިވަނީ ސައިޓް D,F,G,L ގައި ހިމެނޭ ޖުމްލަ 378 ހެކްޓަރުގެ ބިން ހިއްކުމަށެވެ. އޭގެ ތެރެއިން އެކުންފުންޏަށް މިހާތަނަށް ހިއްކުނީ 100 ހެކްޓަރެވެ. އެއީ އެފަރާތުން ހިއްކަންޖެހޭ ބިމުގެ 25 އިންސައްތައެވެ. 

ރަސްމާލޭގެ ހިއްކާފައި އޮތް ސަރަހައްދެއް... ފޮޓޯ: ވޮއިސް

ރަސްމާލެ ހިއްކުމުގެ މަސައްކަތް އެންމެ ފުރަތަމަ ފެށީ ސީއެމްސީ ކުންފުނިންނެވެ. އެކުންފުންޏަށް ހިއްކުނީ 29 ހެކްޓަރެވެ. މީގެ ތެރެއިން 10 ހެކްޓަރު ހިއްކާފައިވަނީ ރައްޔިތުންގެ ކުންފުނި އެމްޓީސީސީންނެވެ.

ރަސްމާލެ ހިއްކަނީ ތިމާވެއްޓާ ވީހާވެސް ރައްކާތެރިގޮތަށްކަމަށް އެޗްޑީސީން ވަނީ ބުނެފައެވެ. އެގޮތުްނ ރަސްމާލެ ހިއްކަމުންދާ ސަރަހައްދުގައި ހުންނަ މުރަކަތައް ނަގައި އެހެން ސަރަހައްދުތަކުގައި އިންދުމުގެ މަސައްކަތް ކުރަމުންދާއިރު އެގޮތަށް 21،700 އެހާ މުރަކަ އެގޮތަށް ނަގައި އެކި ހިސާބުތަކުގައި އާލާކުރުމުގެ މަސައްކަތް ވަނީ ކުރިއަށްގެންގޮސްފައެވެ.

ރަސްމާލޭގެ ހިއްކާފައި އޮތް ސަރަހައްދެއް... ފޮޓޯ: ވޮއިސް

ރަސްމާލެ ހިއްކަނީ ހުޅުމާލެއަށްވުރެ ބިންގަނޑު އުސްކޮށެވެ. ހުޅުމާލެ ހިއްކާފައިވަނީ ކަނޑުގެ ލޮނުގަނޑަށްވުރެ 2 މީޓަރު އުސްކޮށް ކަމަށްވާއިރު، ރަސްމާލެ ހިއްކަނީ 2.5 މީޓަރު އުސްކޮށެވެ. އެޗްޑިސީން ބުނީ ކުރިއަށްއޮތް ތަނުގައި ރަސްމާލެ ހިއްކުމުގެ މަސައްކަތް އަވަސްވެގެންދާނޭކަމަށާއި އެގޮތުން އެ މަޝްރޫޢުގެ ބިން ހިއްކުމުގެ މަސައްކަތް އަންނަ އަހަރުގެ ތެރޭގައި ނިންމާލެވޭނޭކަމަށް ވަނީ ބުނެފައެވެ.

ރަސްމާލެ މަޝްރޫޢުގެ ދަށުން މިހާތަނަށް 130 ހަކަށް މީޓަރު ހިއްކާފައިވާއިރު، މިއީ އަދި މުޅި މަޝްރޫޢުގެ 12 ވަރަކަށް އިންސައްތައެވެ. ރަސްމާލެ ހިއްކައި ނިމޭއިރު ހުޅުމާލޭގެ ތިން ފިޔަވަހީގެ ތިންގުނަ ބޮޑުވާނޭކަމަށް ސަރުކާރުން ވަނީ ބުނެފައެވެ. 

ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމުގެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.