އއ. ހިމަންދޫގައި އިމާރާތް ކުރުމަށް ހަމަޖެހިފައިވާ ފުލުހުންގެ މަރުކަޒުގެ އަމަލީ މަސައްކަތް މިއަދު ފަށައިފިއެވެ.

ހިމަންދޫގައި އަޅާ ފުލުހުންގެ މަރުކަޒުގެ ބިންގާ މިއަދު އެރަށަށް ރައީސް ކުރެއްވި ޒިޔާރަތުގެ ތެރެއިން އެކަމަށްޓަކައި މިއަދު ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ރައީސުލްޖުމަހޫރިއްޔާ ޑރ. މުހައްމަދު މުއިއްޒު ބައިވެރިވެ ވަޑައިގެންނެވި އެވެ.

ފުލުހުންގެ މަރުކަޒުގެ ޢަމަލީ މަސައްކަތް ފައްޓަވިދެއްވީ ދާޙިލިީ ސަލާމަތައި ފަންނިއްޔަތާއި ބެހޭ ވަޒީރު ޢަލީ އިޙްސާންއެވެ. ބިންގާ އެޅުމުގައި ވަޒީރާއެކު ކޮމިޝަނަރ އޮފް ޕޮލިސް އިސްމާއިލް ނަވީންއާއި، ރޯޑް ޑިވެލޮޕްމެންޓު ކޯޕަރޭޝަންގެ މެނޭޖިންގް ޑިރެކްޓަރ އިބްރާހިމް ނަޒީމް ބައިވެރިވެ ވަޑައިގަތެވެ.

ހިމަންދޫގައި ތަރައްގީކުރާ ފުލުހުންގެ މަރުކަޒަކީ އާރްޑީސިއާއި ހަވާލުކޮއްގެން ކުރިއަށް ގެންދާ މަޝްރޫއުއެކެވެ. މަޝްރޫޢުގެ ޖުމްލަ އަގަކީ، 2.04 މިލިއަން ރުފިޔާއެވެ. މި މަޝްރޫއުގެ އެއްބަސްވުމުގައި ސޮއިކޮށްފައި ވަނީ މިއަހަރުގެ މާޗްމަހުގެ 15 ވަނަ ދުވަހުއެވެ. އާރުޑީސީން ބުނީ ފުލުހުންގެ މަރުކަޒުގެ މަސައްކަތް މިހިނގާ އޮކްޓޯބަރުމަހުގެ 7 ވަނަ ދުވަހަށް ނިންމާލެވޭނޭކަމަށެވެ. 

ހިމަންދޫގައި ފުލުހުންގެ މަރުކަޒުގެ ބިންގާ އަޅާފައިމިވަނީ، ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ޙިދުމަތް ފުޅާކުރެއްވުމަށް ރައީސް ގެންގުޅުއްވާ ސިޔާސަތުގެ ތެރެއިންނެވެ.