އއ.މަތިވެރީގައި އެއާޕޯޓް އެޅުމަށް ބޭނުންވާ ބިން ހިއްކުމުގެ އަމަލީ މަސައްކަތް ފަށައިފިއެވެ.
މަތިވެރީ ބިންހިއްކުމުގެ މަސައްކަތް ފަށާފައިވަނީ ރައީސުލްޖުމްހޫރިއްޔާ އެރަށަށް ކުރެއްވި ދަތުރުފުޅުގެ ތެރެއިން މިއަދު ހެނދުނެވެ. ބިންހިއްކުން ފައްޓަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
މަތިވެރީ ބިންހިއްކުމުގެ މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް އެއާޕޯޓްސް ކޮމްޕެނީއާއެވެ. އެމްއޭސީއެލުން އެ މަސައްކަތް ކުރަނީ އެކުންފުނިން ހަރަދުކުރާގޮތަށް ކްރޮސް ސަބްސިޑީގެ އުސޫލުންނެވެ.
މަތިވެރީ ފަޅުގައި އެޅުމަށް ނިންމާފައިވަނީ 1500 މީޓަރ ދިގު އަދި 30 މީޓަރު ފުޅާ ރަންވޭއެއް ހިމެނޭ އެއާޕޯޓެކެވެ.
މިކަމާ ގުޅޭގޮތުން މަތިވެރި ރައްޔިތުންނާ ބައްދަލުކުރެއްވުމަށް މިރޭ އެރަށުގައި ބޭއްވި ޖަލްސާގައި ރައީސް ޑރ.މުހައްމަދު މުއިއްޒު ވިދާޅުވީ މަތިވެރީގައި އެޅުމަށް ނިންމާފައިވާ އެއާޕޯޓަކީ އިގްތިސާދީގޮތުން ދެކޮޅު ޖެހޭނޭ އެއާޕޯޓެއްކަމަށެވެ. މި އެއާޕޯޓްގެ ސަބަބުން އިގްތިސާދީގޮތުން އެ ސަރަހައްދަށް ކުރިއެރުންތައް ލިބޭނޭކަމަށް ރައީސް ފާހަގަކުރެއްވިއެވެ.
މަތިވެރީގައި އެއާޕޯޓެއް ތަރައްޤީކުރުމުގެ މަސައްކަތުގެ އިތުރުންވެސް އުމްރާނީ ތަރައްޤީގެ މަޝްރޫޢުތައް އެރަށުގައި ހިންގުމަށް ވަނީ ނިންމާފައެވެ. އެގޮތުން މަތިވެރީގައި ގާއިމްކުރާ ވޭސްޓްމެނޭޖްމަންޓް ސެންޓަރުގެ ބިންގާ މިއަދު ވަނީ އަޅާފައެވެ.
މަތިވެރީއަކީ ފަތުރުވެރިކަމުގެ ވިޔަފާރި ކުރިއަރާފައިވާ ރަށެކެވެ. މީގެ އިތުރުން އެރަށް ހިމެނޭ ސަރަހައްދުގައި ފަތުރުވެރިކަން ވަނީ ވަރަށްބޮޑަށް ފުޅާވެފައެވެ.
Advertisement
This content is created and paid for by advertisers and does not involve Voice Journalists
