އެމްއެމްއޭ ކުރިމަތިން އޮންނަ ފަޅު، އުޅަނދުތަކަށް ބޭނުންނުކުރެވޭގޮތަށް ވަގުތީގޮތުން ބަންދުކޮށްފިއެވެ.

ލޯކަލް މާރުކޭޓް ސަރަހައްދުން ފެށިގެން ފެރީ ޓާމިނަލާ ހަމަޔަށް ތާރު އަޅައިގެން 4 ލޭނަށްވާގޮތަށް ބޭރުމަގު ތަރައްޤީކުރުމަށް ނިންމާފައިވާކަން ރައީސް ޑރ.މުއިއްޒު ވިދާޅުވެފައިވަނީ، މިއަހަރުގެ ފެބުރުއަރީމަހުގެ ތެރޭގައެވެ. އެ ސަރަހައްދު ތަރައްޤީކުރުމުގެ މަސައްކަތް ފެށުމަށް އެމްޓީސީސީން ދަނީ ތައްޔާރުވަމުންނެވެ.

މިކަމާ ގުޅޭގޮތުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ، މާލޭ އުތުރު ފަރާތު ބޮޑު ތަކުރުފާނު މަގު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމަށްޓަކައި ރަސްމީ ފާލަމާއި ލޯކަލް މާރުކޭޓާ ދެމެދުގައިވާ ސަރަޙައްދުން ބައެއް ބަންދުކޮށް ޓްރެފިކް ރޫޓަށް ބަދަލު ގެނެސްފައިވާކަމަށެވެ. އަދި އެ ސަރަޙައްދުގެ ފަޅުވެސް އުޅަނދުތަކަށް ބޭނުން ނުކުރެވޭ ގޮތަށް ބަންދު ކުރެވިފައިވާކަން މިނިސްޓަރު ވިދާޅުވިއެވެ.

މިނިސްޓަރު މުއްތަލިބް ވަނީ މި މަސައްކަތުގައި ޢާންމު ރައްޔިތުންގެ ފަރާތުން އެއްބާރުލުން ދެއްވުމަށް އެދިވަޑައިގަންނަވާފައެވެ.

އެމްއެމްއޭ އަދި އެއްނަމްބަރު ފާލަން ސަރަަހައްދަކީ މާލެ އައިސް ގޮސްހަދާ ލޯންޗްފަހަރުތަކުން އާއްމުކޮށް ބޭނުންކުރާ ސަރަހައްދެވެ. އެ ސަރަހައްދު ބޭނުންކުރަނީ ލޯންޗްތަކުން މީހުން އަރާ ފޭބުމަށް އެންމެ ފަސޭހައީ އެސަރަހައްދު ކަމަށްވާތީއެވެ. އެ ސަރަހައްދުގެ ބަދަލުގައި، އެމްޓީސީސީން ވަނީ ލޯންޗްތަކަށް ހެންވޭރު ފެރީ ޓާމިނަލާއި، ހުޅުމާލޭ ފެރީ ޓާމިނަލް ބޭނުންކުރެވޭނޭ އިންތިޒާމް ވަކި އުސޫލެއްގެ ދަށުން ހަމަޖައްސައިދީފައެވެ.

އެމްއެމްއޭ ޖެޓީ ސަރަހައްދަކީ މާލެ އަރައި ފޭބުމަށް އެންމެގިނައިން ބޭނުންކުރާ ތަން... ފޮޓޯ: ވޮއިސް

މާލޭ އުތުރުފަރާތު ބޮޑުތަކުރުފާނުމަގު ސަރަހައްދު 4 ލޭނު ހިމަނައިގެން ޒަމާނީ ފެންވަރަށް ތަރައްޤީކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފައިވަނީ މިއަހަރުގެ އޭޕްރިލްމަހުއެވެ. 

އެމްޓީސީސީއާ މަސައްކަތް ހަވާލުކުރެއްވުމަށް ކުރިއަށްގެންދިޔަ ސޮއިކުރުމުގެ ރަސްމިއްޔާތުގައި އިމާރާތް ކުރުމާބެހޭ ވުޒާރާގެ ވަޒީރު މުއްތަލިބް އޭރު ވިދާޅުވެފައިވަނީ، ބޮޑުތަކުރުފާނުމަގު ތަރައްޤީކުރުން ނޯތު ހާބަރާ ހަމަޔަށް ކުރިއަށްގެންދާނޭކަމަށެވެ. އެގޮތުން ފުރަތަމަ ފިޔަވަހީގެ މަސައްކަތް ކުރިއަށްދާނީ ލޯކަލް މާރުކެޓާ ހިސާބަށް ކަމަށާއި، މި މަސައްކަތް ކުރިއަށްގެންދަނީ ވަރަށް ރަނަގޅު ޕްލޭނެއްގެ ދަށުން ކަމަށެވެ. އެ ސަރަހައްދު ތަރައްޤީކުރާނީ ޓްރެފިކަށް ދަތި ނުވާނޭހެން ކަމަށްވެސް ވަޒީރު ވިދާޅުވިއެވެ.

އެއްބަސްަވުމުގެ ދަށުން ހުޅުމާލެ ފެރީ ޓަރމިނަލުން ފެށިގެން ލޯކަލް މާރުކޭޓް ސަރަހައްދާ ހަމަޔަށް އޮންނަ 800 މީޓަރުގެ ސަރަހައްދެއްގައި ތާރު އަޅާނެއެވެ. މަގު ފުޅާ ކުރާއިރު ކީވޯލް ބޭރަށް ޖެއްސުމުގެ މަސައްކަތާއި، ފެން ހިންދާ ނިޒާމު ޤާއިމްކުރުމުގެ އިތުރުން ދުވާރުތައް ހެދުމާއި ރޯޑްމާކިން އަދި ސައިން ބޯޑުތައްވެސް ހަރުކުރެވިގެންދާނޭކަމަށް އެ މަސައްކަތުގެ ކޮންޓްރެކްޓަރު އެމްޓީސީސީން ވަނީ ބުނެފައެވެ. މި މަސައްކަތް އެމްޓީސީސީއާ ހަވާލުކުރީ 144.5 މިލިއަން ރުފިޔާގެ އަގަކަށެވެ.