ޢިލްމުވެރިންގެ ގުޅުމުން ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއުއާ ބައްދަލުކޮށް މުހިންމު މަޝްވަރާތަކެއް ކޮށްފި އެވެ.

ރާއްޖޭގެ ވަރަށް ގިނަ ދީނީ އިލްމުވެރީންގެ ބައިވެރިވުން އޮތް އިލްމުވެރީންގެ ގުޅުމުން ބުނީ ކުޅިވަރާއި ހަށިހެޔޮކަމާ ބެހޭ ވުޒާރާގައި އޮތް މި ބައްދަލުވުމަކީ، ރާއްޖޭގެ ކުޅިވަރުގެ ދާއިރާގައި ހުރި ބައެއް ކަންކަމާ މެދު ދީނީ އިލްމުވެރިންގެ ހުރި ކަންބޮޑުވުންތަކާއި، ސަރުކާރުގެ ފަރާތުން ކުޅިވަރުގެ ދާއިރާގެ ކަންކަން އިސްލާމީ ގިއުގަނޑުގެ ތެރެއަށް ފެއްތުމަށް ޓަކައި ކުރެވެން ހުރި ކަންކަމާ މެދު މަޝްވަރާ ކުރުމަށް ބޭއްވުނު ބައްދަލުވުމެއް ކަމަށެވެ.

މި ބައްދަލުވުމުގައި މަޝްވަރާ ކުރެވުނު ކަންކަމުގެ ތެރޭގައި ނަމާދު ގަޑިތަކާ ދިމާކޮށް ބޭއްވޭ ކުޅިވަރު މުބާރާތްތަކުގެ މައްސަލަ އާއި ދަން ގަޑިތަކުގައި ކުރިއަށް ގެންދެވޭ ކުޅިވަރު މުބާރާތްތަކުގެ ސަބަބުން ކިޔަވާކުދިންނާއި އުމުރުން ދުވަސްވީ މީހުންނާއި އާންމުންނަށް ކުރިމަތިވާ ދަތިތަކާއި ހުކުރު ވަގުތަށް ކުޅިވަރު މައިދާންތައް ބަންދުކުރުމުގެ މުހިންމުކަމަން ފާހަގަކޮށް މަޝްވަރާ ކުރެވުނު ކަމަށެވެ.

އަދި ކުޅިވަރު މައިދާންތަކުގައި ވުޟޫކޮށް ނަމާދު ކުރެވޭނެ ގޮތްތައް ހެދުމާއި، އެތަންތަނުގައި ވެސް ދީނީ ޝިއާރު އާލާކޮށް، ހޭލުންތެރިކަން އުފެއްދުމަށް ތަފާތު ވަސީލަތްތައް ބޭނުންކުރުން ފަދަ ކަންކަން ވެސް ހިމެނެ އެވެ.

މީގެ އިތުރުން ޔޯގާ މައްސަލަ އާއި ކުޅިވަރަށް ބޭނުންވާ އުސޫލުތައް ދީނީ އިމުގެ ތެރެއިން އެކުލަވައިލުމުގެ މައްޗަށް ވެސް މި ބައްދަލުވުމުގައި ވަރަށް ތަފްސީލީ ގޮތެއްގައި މަޝްވަރާ ކުރެވުނު ކަމަށްވެސް އެ ގުޅުމުން ބުންޏެވެ.

ވަޒީރުގެ ފަރާތްޕުޅުން މި ބައްދަލުވުމުގައި އިލްމުވެރިންނަށް ލިބިގެން ދިޔަ އެއްބާރުލުމާއި ދެއްވި ޔަގީން ކަމަށް އިލްމުވެރިންގެ ގުޅުމުގެ ފަރާތުން ޝުކުރުއަދާކޮށްފައިވެ އެވެ.