ހުސްވި ޖުލައިމަހުގެ 13 ވަނަ ދުވަހުގެ ރޭ ދަންވަރު އއ. މާޅޮހުގައި ރަހުމްކުޑަ ގޮތަކަށް ޒަޚަމްކޮށްލުމުގެ ސަބަބުން މަރުވި، އެރަށު އޯކިޑްމާގެ، ޢަބްދުއްރަޙްމާން އާދަމް (65 އަހަރު) މަރުގެ މައްސަލާގައި ތިން މީހަކު ހައްޔަރުކޮށްފިއެވެ.
މިކަން ޔަގީންކޮށްދެމުން ފުލުހުން މިއަދު ބުނީ ޢަބްދުއްރަހްމާން މަރާލުމުގައި ބައިވެރިކަމުގެ ތުހުމަތުގައި 3 މީހަކު ފުލުހުން ހައްޔަރުކޮށްފައިވާކަމަށެވެ. ނަމަވެސް ހައްޔަރުކުރި މީހުންގެ އެއްވެސް މައުލޫމާތެއް ފުލުހުން ހާމަކޮށްފައެއް ނުވެއެވެ.
މައްސަލަ ތަހްގީގްކުރުމުގެ ގޮތުން ފުލުހުން ވަނީ އަބްދުއްރަހްމާނުގެ ހަށިގަނޑު ބޭރަށް ފޮނުވައިގެން ޕޯޓްސްމޯޓަމް ހަދާފައެވެ. ޢަބްދުއްރަހްމާނުގެ ޕޯސްޓް މޯޓަމް ރިޕޯޓުގެ ނަތީޖާއިން ދައްކާފައިވަނީ އޭނާ މަރުވީ ބޮލަށް ލިބުނު އަނިޔާތަކުގެ ސަބަބުންކަމަށް ފުލުހުން ވަނީ ބުނެފައެވެ.
ޕޯސްޓްމޯޓަމް ހެދުމަށްފަހު ޢަބްދުއްރަހްމާނުގެ ހަށިގަނޑު މާލެ ގެނެސްފައިވަނީ ޖުލައިމަހުގެ 24 ވަނަ ދުވަހުއެވެ. ޕޯސްޓްމޯޓަމް ހަދަން އަބްދުއްރަޙްމާންގެ ހަށިގަނޑު ފޮނުވީ އިންޑިޔާގެ ތްރިވަނަންތަޕޫރަމް އަށެވެ. ޕޯސްޓް މޯޓަމް ހެދުމަށްފަހު ރާއްޖެގެނެސް އޭނާ ވަޅުލާފައިވަނީ މިދިޔަ ބްރާސްފަތިދުވަހުއެވެ.
މި މައްސަލައާ ގުޅިގެން ފުލުހުންގެ ޓީމެއް މާޅޮހަށް ގޮސް ވަނީ ތަހުގީގު ކުރިއަށް ގެންގޮސްފަ އެވެ.
Advertisement
This content is created and paid for by advertisers and does not involve Voice Journalists
