ބޮޑެތި އަދަބުތަކެއް ލިބޭގޮތަށް ތަސްދީގުކޮށްފައިވާ ނުރައްކާތެރި ކުށްތަކާބެހޭ ޤާނޫނަށް މިއަދުން ފެށިގެން އަމަލުކުރަން ފަށައިފިއެވެ.

ގޭންގު ކުށްތަށް ހުއްޓުވުމަށް ފަރުމާކޮށް ޤާނޫނަށް އިސްލާހް ހުށަހެޅި މި ބިލް ފާސްކޮށްފައިވަނީ، މިއަހަރުގެ މެއިމަހުގެ 15 ވަނަ ދުވަހެވެ. އަދި މި ބިލް ރައީސުލްޖުމްހޫރިއްޔާ ތަސްދީގުކޮށްފައިވަނީ، މެއިމަހުގެ 25 ވަނަ ދުވަހެވެ. ގޭންގް ޤާނޫނަކާއި ބިރުދެއްކުމާއި ނުރައްކާތެރި ހަތިޔާރާއި، ތޫނު ހަތިޔާރު ގެންގުޅުން މަނާކުރުމުގެ ޤާނޫނަކަށް އަމަލުކުރަމުންދިޔަނަމަވެސް ބޮޑެތި ކުށްތައް ހުއްޓުވުމަށް ކަމާބެހޭ ފަރާތްތަކަށް މާބޮޑު ކަމެއް ކުރެވިފައި ނެތުމަކީ އެފަދަ ޤާނޫނެއް ހަދަންޖެހުނު މައިގަނޑު ސަބަބުކަމަށް ސަރުކާރުން ވަނީ ބުނެފައެވެ.

އައު ޤާނޫނު އެކުލަވާލާފައިވަނީ، ރާއްޖޭގައި ނުރައްކާތެރި އަދި އިންތިޒާމުވެގެން ހިންގާ ބޮޑެތި ކުށްކުރުން ހުއްޓުވުމަށް ތަންފީޒީ އިދާރާތަކަށް ބޮޑެތި ބާރުތަކެއް ލިބޭގޮތަށެވެ.

މި ޤާނޫނަށް އަމަލުކުރަން ފެށުމުން ގޭންގްތަކާއި ގުޅިގެން، ނުވަތަ އެނޫން ބޮޑެތި ކުށްކުށަށް އަރައިގަނެގެން، ނުހައްގު މުއްސަނދިކަން ހޯދާފައިވާ މީހުންގެ މައްސަލަތައް ތަޙްޤީގުކޮށް، އެގޮތުން ހޯދާފައިވާ ފައިސާއާއި މުދާ ކޯޓު މެދުވެރިކޮށް ދައުލަތަށް ނެގިގެންދާއިރު، ކުޑަކުދިން ގޭންގްތަކާ ގުޅުމާ، ބޮޑެތި ކުށްތައް ކުރުމުގައި ބައިވެރިވުން ހުއްޓުވުމަށް ޚާއްޞަ ފިޔަވަޅުތަކެއް އެޅިގެންދާނެއެވެ. އެގޮތުން އުމުރުން 18 އަހަރު ނުވާ ކުއްޖަކަށް ވަޅިއެއް ވިއްކައިފިނަމަ 20 ހާސްރުފިޔާ އާއި އެއްލައްކަ ރުފިޔާއާ ދެމެދުގެ އަދަދަކުން ޖޫރިމަނާކުރެވެއެވެ.

މި ޤާނޫނަށް މިއަދުން ފެށިގެން އަމަލުކުރާއިރު ގޭންގެއް އުފެއްދުމާއި ހިންގުމާއި އަދި ގްރޫޕަށް މީހުން ހޯދުންފަދަ އަމަލުތަކަށް ބޮޑެތި އަދަބުތަކެއް ވަނީ ކަނޑައެޅިފައެވެެ. މި ޤާނޫނުގެ ދަށުން ގޭންގަކުން ކުޑަކުއްޖަކު ކުށުގައި ބައިވެރިކޮށްފިނަމަ އެފަރާތެއް އުމުރަށް ޖަލަށްލައި، 2 ލައްކަ ރުފިޔާ އާއި 10 މިލިއަން ރުފިޔާ އާ ދޭތެރޭގެ އަދަދަކުން ޖޫރިމަނާކުރެވެއެވެ. އުމުރުން 18 އަހަރުން މަތީ މީހެއް ގޭންގަށް ވައްދައިފިކަން ސާބިތުވެއްޖެނަމަ، އެމީހަކަށް 20 އަހަރުގެ ޖަލުހުކުމަކާއެކު 7 މިލިއަން ރުފިޔާއަށްވުރެ ބޮޑުނުވާގޮތަށް ޖޫރިމަނާ ކުރެވެއެވެ.