އެކުވެރި ދައުލަތްތަކުގެ ހިއުމަން ރައިޓްސް ކައުންސިލްގެ ވައިސް ޕްރެޒިޑެންޓްގެ މަގާމަށް ރާއްޖެ އިންތިހާބުވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު، މަރްހަބާ ވިދާޅުވެއްޖެ އެވެ.

އދގެ ވައިސް ޕްރެޒިޑެންޓްގެ ހައިސިއްޔަތުން، އޭޝިއާ-ޕެސިފިކް ގްރޫޕުގެ މަސްއޫލިއްޔަތުތައް ދެން އަދާކުރަމުން ދާނީ ރާއްޖެއިން ނެވެ.

އެކްސްގައި ހިއްސާކުރެއްވި ޕޯސްޓުގައި ރައީސުލްޖުމްހޫރިއްޔާ ވިދާޅުވީ، ރާއްޖެއަކީ އިންސާނީ ހައްގުތަކާ ގުޅުންހުރި ކަންކަމުގައި، ވަކިން ހާއްސަކޮށް، ތަރައްގީ ވަމުން އަންނަ ކުދި ޖަޒީރާ ގައުމުތައް (ސިޑްސް) އާ ގުޅިފައިވާ އިންސާނީ ހައްގުތަކުގެ ކަންކަމުގައި ހަރުދަނާ ގޮތެއްގައި އަޑުއުފުލައި، އެހީތެރިކަން ފޯރުކޮށްދިނުމުގެ ތާރީހެއް އޮތް ގައުމެއް ކަމަށެވެ.

މިއީ ލިބުނު ކާމިޔާބީއެއްގެ ގޮތުގައި ސިފަކުރައްވައި، އިންސާނީ ހައްގުތަކާބެހޭ ކައުންސިލްގެ ހަރަކާތްތެރި މެމްބަރެއްގެ ހައިސިއްޔަތުން ރާއްޖެއިން ވެފައިވާ ހަރުދަނާ ވައުދުތަކާ އެއްގޮތްވާ ގޮތުގެ މަތިން، އަދުލުއިންސާފާއި، ހަމަހަމަކަމާއި، އިންސާނީ ކަރާމާތުގެ އުސޫލުތައް ނެގެހެއްޓުމަށް ރާއްޖެއިން ކުރަމުން ގެންދާ މަސައްކަތްތައް އިތުރަށް ހަރުދަނާވެގެންދާނެ ކަމުގައި ވެސް ރައީސުލްޖުމްހޫރިއްޔާގެ ޕޯސްޓުގައި ވަނީ ވިދާޅުވެފަ އެވެ.

އަދި ކޮންމެ މީހަކަށްވެސް އިންސާފުވެރި، އެންމެންގެ ބައިވެރިވުން އޮތް، ޝާމިލު ދުނިޔެއަކަށް ރާއްޖެއިން މަސައްކަތް ކުރައްވާނެކަމުގެ ޔަގީންކަން ރައީސުލްޖުމްހޫރިއްޔާގެ ޕޯސްޓުގައި ވަނީ ވިދާޅުވެފަ އެވެ.