ޣައްޒާގައި ކާބޯތަކެއްޗަށް ބޭނުންވެފައިތިބި އެތައް ބަޔަކު އެބަތިބިކަމަށާއި، ވީ އެންމެއަވަހަކަށް އެފަރާތްތަކަށް ކާބޯތަކެތި ފޯރުކޮށްދެވޭނެ ގޮތެއް ހަމަޖައްސައިދިނުމަށް ޣައްޒާގެ ޗެރިޓީ ޔޫނިއަން ޖަމިއްޔާއިން ގޮވާލައިފިއެވެ.

ޣައްޒާގެ ޖެނެރަލް ސެކެރެޓަރީ ޔެރިތީ ޔޫނިއަން މުސްތަފާ އަލަގްހާ ސޮއިކޮށް ނެރެފައިވާ ބަޔާނެއްގައި ބުނެފައިވަނީ، ޣައްޒާގެ ރައްޔިތުން މިހާރު ތަހައްމަލުކުރަމުން އެދަނީ ތާރީހުގައިވެސް ކުރިމަތިނުވާފަދަ ބަނޑުހައި ހޫނުކަމުގެ ދުަވަސްތަކެއް ކަމަށެވެ.

ހައްދުފަހަނަ އަޅާފައިވާ ޔަހޫދީ ސިފައިން ޣައްޒާ ހިފުމަށް ހިންގަމުްނގެންދާ އޮޕަރޭޝަނުގައި އެ ސިޓީގެ އެތައް ބަޔަކު ބަނޑުހައިހޫނުކަމުގައި ތިބިއިރު، މުޅި ޣައްޒާ ސިޓީއަށް ވަނީ ބަނޑުހައިހޫނުކަމުގެ ކާރިސާއެއް ކުރިމަތިވެފައެވެ. އދ އިންވެސް ވަނީ އެ ސިޓީގައި ބަނޑުހައިހޫނުކަމުގެ ސަބަބުން އެތައް ބަޔަކު މަރުވެދާނެކަމުގެ އިންޒާރުދީފައެވެ.

ޣައްޒާ ޗެރިޓީ ޔޫނިއަނުން ނެރެފައިވާ ބަޔާނުގައި ވަނީ ބައިނަލްއަޤްވާމީ އިންސާނީ އެހީދޭ ފަރާތްތަކުގެ ކިބައިން ޣައްޒާއަށް ކާބޯތަކެއްޗާއި އެނޫންވެސް ޒަރުރީ އެހީ މިހާރުން މިހާރަށް ބޭނުންވާކަމަށް ގޮވާލައި އެހީ އަވަސްކުރުމަށް އެދިފައެވެ. 

އިސްރާއީލުން ޢައްޒާ ހިފުމަށް ހިންގަމުންގެންދާ އުދުއާންތަކުގައި މިހާރުވެސް އެސިޓީގެ ކުޑަކުދިންނަށް ވަނީ ކާނާ ނުލިބުމުގެ ސަބަބުން ހިކި އަނަރޫފަވެފައެވެ. އިސްރާއީލްގެ އަސްކަރިއްޔާއިން ދަނީ މާޗްމަހުން ފެށިގެން ޣައްޒާގެ ސަރަހައްދީ ރޮނގު ބަންދުކޮށް ކާބޯތަކެތީގެ އެހީތައް ޢައްޒާއަށް ވެއްދުމަށް ހުަރަސްއަޅަމުންނެވެ. އެހީގެ ސާމާނު ވެއްދުމަށް ވަގުތު ދިންމަަވެސް ފުރުސަތު ފެނީ ވަރަށް ކުޑަވަގުތުކޮޅަކަށެވެ.

ޣައްޒާ ބަނޑަށްޖެހި ކާބޯތަކެތި ބޭނުންވާކަމަށް ޣައްޒާ ޗެރިޓީ ޔޫނިއަނުން ބުނެފައިވާއިރު، ޣައްޒާއަށް އެހީގެ ތަކެތި ފޯރުކޮށްދިނުމުގެ ކުރަންޖެހޭ މަސައްކަތްތައް މިވަގުތު ހާއްސަ އިސްކަމެއްދީގެން ޖަމިއްޔާ ޖަމާއަތްތަކާ ގުޅިގެން މަސައްކަތް ކުރަމުންދާކަމަށް އިންޓަނޭޝަނަލް އެއިޑް ކެމްޕެއިން (އައިއޭސީ) އިން ވަނީ ބުނެފައެވެ.