ކުށްކުރާ ގުރޫޕްތައް ކަނޑަައަޅާ ނުހައްގުން ހޯދާފައިވާ މުދާ ދައުލަތަށް ނެގުމުގެ މަސައްކަތް ކުރަމުންދާ ކަމަށް ފުލުހުން ބުނެފި އެވެ.
ފުލުހުން އެކަން ހާމަކޮށްފަައި ވަނީ ގޭންގުތަކުން ހިންގާ ކުށްތަކާއި އެ ނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް މި މަހުގެ 25 ވަނަ ދުވަހު އަމަލުކުރަން ފެށުމާއެކު އެ ގާނޫނު ތަންފީޒުކުރަން ކުރަމުންދާ މަސައްކަތްތަކުގެ ތަފްސީލު ހާމަކުރަމުންނެވެ.
ފުލުހުން ބުނީ އިންތިޒާމުވެފައިވާ ކުށްތައް ކުރާ ގުރޫޕްތައް, ހައިކޯޓުން މެދުވެރިކޮށް ކަނޑައެޅުމާއި އެފަދަ ގުރޫޕްތަކަށް ނިސްބަތްވާ މީހުންގެ މައްޗަށް މޮނިޓަކޮށް ކޮންޓްރޯލްކުރުމުގެ އަމުރު ނެރުމާއި އެފަދަ ގުރޫޕްތަކުން ކުރާ އަނިޔާވެރި އަމަލުތަކުން ކުޑަކުދީން ރައްކާތެރިކުރުވުމަށް އެ ކުދީންގެ މައްޗަށް ރައްކާތެރިކުރުމުގެ އަމުރު ނެރުމަށް ފުލުހުންގެ ފަރާތުން ޕީޖީ އޮފީހަށް ހުށައެޅުމަށް ތައްޔާރުވަމުންދާ ކަމަށެވެ.
އަދި ރާއްޖޭގައި ޖަމާއަތް ހަދައިގެން ކުށްކުރާ ހުރިހާ ގުރޫޕްތަކުގެ ރިޕޯޓްތައް ތައްޔާރުކޮށް ޕީޖީ އޮފީހަށް ހުށައެޅުމުގެ ކަންކަން ވެސް ކުރިއަށް ގެންދާނެ ކަމަށް ފުލުހުން ވަނީ ބުނެފަ އެވެ.
މީގެ އިތުރުން އިންތިޒާމުވެގެން ކުށްކުރާ ގުރޫޕްތަކަށް ނިސްބަތްވާ މީހުންގެ ނުހައްގު މުއްސަދިކަމުގެ މައްސަލަތައް ތަހުގީގުކޮށް އެ މީހުން ނުހައްގުން ހޯދާފައިވާ މުދާ ދައުލަތަށް ނެގުމުގެ މަސައްކަތާއި އިންތިޒާމުވެފައިވާ ކުށްކުރާ ގުރޫޕްތަކަށް ކުޑަކުދީންނާއި ޒުވާނުން ރެކްރޫޓް ކުރާ މައްސަލަ ހާއްސަ ސަމާލުކަމެއް ދީގެން ތަހުގީގު ކުރަމުން ގެންދާނެ ކަމަށެވެ.
އަދި ކުށްކުރާ ގުރޫޕްތައް އެއްވާ ސަރަހައްދުތަކުގައި ފުލުހުންގެ ވިޒިބިލިޓީ އިތުރުކޮށް އެ ސަރަހައްދުތަކުގައި ތިބޭ މީހުން ބަލާ ފާސްކުރުމުގެ މަސައްކަތާއި ކުށްކުުރުމަށް އަމިއްލަ ތަންތަން ބޭނުންކުރަމުންދާތީ އެފަދަ ތަންތަން ރެއިޑްކޮށް ބަލައި ފާސްކުުރުމުގެ މަސައްކަތް ކުރާނެ ކަމަށެވެ.
މިއީ މުޅި މުޖްތަމައުގެ ސަލާމަތާއި ރައްކާތެރިކަމަށް އަޅަމުންދާ ފިޔަވަޅުތަކެއްކަން ފާާހަގަކޮށް ފުލުހުން ބުނީ މިފަދަ ކަންކަމުގައި އާންމުންގެ ފަރާތުން ލިބެމުންދާ އެއްބާރުލުމަށް ޝުކުރު އަދާކުރާ ކަމަށެވެ.
Advertisement
This content is created and paid for by advertisers and does not involve Voice Journalists
