މީޑިއާ ބިލް މާދަމާގެ ޖަލްސާގެ އެޖެންޑާގައި، އެމްޑީޕީން މުޒާހަރާއަށް
މީޑިއާގެ ކަންކަން ބެލުމަށް ރައްޔިތުންގެ މަޖިލީހުގެ ތަޅުމަށް ހުށެހެޅި ބިލް މާދަމާގެ ޖަލްސާގެ އެޖެންޑާގައި ހިމަނައިފި އެވެ.
މީޑިއާތައް ރެގިއުލޭޓްކުރުމަށް ރައްޔިތުންގެ މަޖިލީހަށް ހުށަހަޅާފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލް" ހުށައެޅީ ތުޅާދޫ ދާއިރާގެ މެންބަރު އަބްދުލްހަންނާން އެވެ. ދައުރުން ބޭރުގައި މާދަމާ ބާއްވަން ހަމަޖެހިފައިވާ ޖަލްސާއަށް އެ ބިލް ވަނީ އެޖެންޑާކޮަށްފަ އެވެ.
އެގޮތުން ފުރަތަމަ ކިއުން އިއްވާނެ އެވެ. އަދި މާދަމާގެ ޖަލްސާގައި އެ ބިލް ބަލައިގަންނާނެ ކަމަށް ބެލެވެ އެވެ. މަޖިލީހުގެ މެޖޯރިޓީ އޮތް ޕީއެންސީގެ ރޫހު އޮތީ ބިލް ބަލައިގަތުމަށެވެ.
މި ބިލް ފަރުމާކޮށްފައިވަނީ ގާނޫނު އަސާސީން ނޫސްވެރިކަމުގެ މިނިވަންކަމަށް ވަރަށްބޮޑަށް ހުރަސް އެޅޭގޮތަށް ކަމަށާއި، ބިލް ފަރުމާކޮށްފައިވަނީ މަޖިލީހުގައި އެއިރެއްގައި އޮންނަ މެޖޯރިޓީ ޕާޓީއަކަށް މުޅި މީޑިއާގެ ކޮންޓްރޯލް ލިބޭ ގޮތަށް ކަމަށް މީޑިއާތަކާއި މީޑިއާތަކުގެ ބެލެނިވެރި ފަރާތުން ވަނީ ބުނެފަ އެވެ.
އަދި މި ބިލުން އުފައްދާ ކޮމިޝަން އެކުލެވިގެންވާގޮތުން އަދި މެމްބަރުން ވަކިކުރުމުގެ ބާރު ދީފައިވާގޮތުން މީޑިއާތަކަށް މިނިވަންކަމާއެކު މަސައްކަތްކުރުމަށް ހުރަސްއެޅި، ވަރަށްބޮޑަށް ހުރިހާ ބާރެއް ރައީސުލްޖުމްހޫރިއްޔާ އަދި ރައްޔިތުްނގެ މަޖިލީހަށް ލިބިދޭ ކަމަށް ބުނެފައިވެ އެވެ.
އެބިލް އެޖެންޑާ ކުރާތީ މާދަމާ ހެނދުނު 9:00 އަށް މަޖިލީސް ދޮށަށް އެއްވެ މުޒާހަރާކުރަން އެމްޑީޕީން ވަނީ ނިންމާފަ އެވެ.
Advertisement
This content is created and paid for by advertisers and does not involve Voice Journalists
