އަސާސީ ހައްޤުތައް ހިފެހެއްޓޭނެ މިންގަނޑުތައް ޤާނޫނޫ އަސާސީގައި ބުނެދީފައި އެބައޮތް: ދިޔާނާ
މިނިވަން ނޫސްވެރިކަމާއި ހިޔާލްފާޅުކުރުމުގެ މިނިވަންކަމަކީ އަސާސީ ހައްޤެއް ކަމަށާއި، އެ ހައްޤުތައް ހިފެހެއްޓޭނެ މިންގަނޑުތައް ޤާނޫނޫ އަސާސީގައި ބުނެދީފައި އެބައޮތްކަމަށް ކުރީގެ އެޓާނީ ޖެނެރަލް އަލްއުސްތާޛާ ފާތިމަތު ދިޔާނާ ސައީދު ވިދާޅުވެއްޖެއެވެ.
ރައްޔިތުންގެ މަޖިލީހަށް މިހާރު ހުށަހަޅާފައިވާ މީޑިއާ ބިލާގުޅޭގޮތުން މީޑިއާއާ ވާހަކަދައްކަވަމުން ފުންނާބު އުސް ޤާނޫނީ ވަކީލު ދިޔާނާ ވިދާޅުވީ، ހިޔާލުފާޅުކުރުމުގެ މިނިވަންކަމާއި މައުލޫމާތު ލިބިގަތުމާއި، މައުލޫމާތު ހާމަކުރުމާއި މައުލޫމާތު ފެތުރުމަކީ އަސާސީ ހައްޤެއް ކަމަށެވެ. ދިޔާނާ ވިދާޅުވީ އަސާސީ ހައްޤުތައް ހިފެހެއްޓޭނެ މިންގަނޑުތައް ޤާނޫނު އަސާސީގައި ބަޔާންކޮށްދީފައިވާކަމަށެވެ.
ދިޔާނާ ވިދާޅުވީ މިހާތަނަށް ފާހަގަކުރެވުނު ކަންކަމަށް ބަލާއިރު، މިހާރު މީޑިއާ ކޮންޓްރޯލް ކުރުމުގެ ނަމުގައި މަޖިލީހަށް ލާފައިވާ އެ ބިލަކީ އިމުން ބޭރުވާ ބިލެއްކަމަށް ދެކެވަޑައިގަންނަވާކަމަށެވެ. އޭނާ ވިދާޅުވީ އުއްމީދަކީ ސަރުކާރުން އެ ބިލުގެ މައްސަލައަށް ހައްލެއް ހޯއްދަވައިދެއްވާނޭކަމަށާއި އެހެންނޫންކަމަށް ވާނަމަ ދެން އޮތީ ޝަރުޢީ މަރުހަލާއަށް ގޮސްގެން އެކަމަށް ހައްލު ހޯދުންކަމަށެވެ. އެގޮތުން ކޯޓުތަކުގެ ދޮރުގައި ޓަކިޖަހައިގެން ނަމަވެސް ނޫސްވެރިންގެ ކަންބޮޑުވުންތަކައިގެން ކުރިއަށް ވަޑައިގަންނަވާނޭކަން ދިޔާނާ ފާހަގަކުރެއްވިއެވެ.
މިހާރު އަމަލުކުރަމުންދާ ފެހި ޤާނޫނު އަސާސީގެ، އަސާސީ ހައްޤުތަކާއި މިނިވަންކަމުގެ ބާބުގެ 27 ވަނަ މާއްދާގައި ހިޔާލުފާޅުކުރުމުގެ މިނިވަންކަމާ ބެހޭ ގޮތުން ބަޔާންކޮށްފައިވަނީ، މިނިވަންކަމާއެކު ފިކުރުކުރުމާއި އިސްލާމްދީނުގެ އަސްލުތަކާ ހިލާފްނުވާ ގޮތެއްގެ މަތިން އެމީހެއްގެ ބުއްދިއަށް ފެންނަ ގޮތްތަކާއި ހިޔާލުތައް ދުލާއި ޤަލަމުން އަދި މިނޫންވެސް ގޮތްތަށް ފާޅުކުރުމުގެ މިނިވަންކަން ކޮންމެ މީހަކަށްމެ ލިބިގެންވާކަމަށެވެ.
އަދި ނޫސްވެރިކަމުގެ މިނިވަންކަމުގެ ބާބުގައި ބުނެފައިވަނީ، ނޫސްވެރިކަން ކުރުމާއި މުއާސަލާތީ ވަސީލަތްތައް ބޭނުންކުރުމުގެ މިނިވަންކަން ކޮންމެ މީހަކަށްމެ ލިބިގެންވެއވެެ. މީހެ ތެރޭގައި ހަބަރާއި މައުލޫމާތާއި ފެންނަ ގޮތްތަކާއި ހިޔާލްފާޅުކުރުމާއި، ޝާއިއުކުރުމާއި، ފެތުރުމުގެ މިނިވަންކަން ހިމެނެއެވެ.
މިގޮތުން ޝާއިއުކުރާ ނުވަތަ ފަތުރާ ނުވަތަ ފާޅުކުރާ މައުލޫމާތެއްގެ މަސްދަރު ހާމަކުރުމަށް އެއްވެސް މީހަކަށް މަޖުބޫރުކޮށްގެން ނުވާނޭކަމަށްވެސް އެ ބާބުގެ 27 ވަނަ މާއްދާގައި ބުނެފައިވެއެވެ.
މަޖިލީހަށް މިހާރު ލާފައިވާ މީޑިއާ ބިލާ ގުޅޭގޮތުން ނޫސްވެރިންގެ ބޮޑެތި ކަންބޮޑުވުންތަކެއް ހުރިއިރު، ނޫސްވެރިން ވަނީ އެ ބިލް އަނބުރާ ގެންދިއުމަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
