ރައްޔިތުންގެ މަޖިލީހަށް މިހާރު ހުށަހަޅާފައިވާ މީޑިއާ ބިލަށް ނޫސްތަކާއި ކަމާބެހޭ މުއައްސަސާތަކުގެ ރަޢުޔު ހޯދުމަށް ކޮމިޓީއަށް ހާޒިރުކުރުމަށް ނިންމައިފިއެވެ.

މީޑިއާ ކޮންޓްރޯލް ކުރުމާބެހޭ ބިލަށް ބޮޑެތި ފާޑުކިޔުންތަކެއް އަމާޒުވެފައިވަނިކޮށް ދައުރުގެ ބޭރުން އިއްޔެ ބެއްވި ޖަލްސާގައި ވަނީ ބިލް ބަލައިގަތުމަށް ނިންމުމަށް ފާސްކޮސްފައެވެ. އަދި ރިޔާސަތުން ވަނީ މީޑިއާބިލް ކޮމިޓީއަށް ފޮނުވިކަން އިއުލާނުކޮށްފައެވެ.

މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ ބައްދަލުވުން މިއަދު ބޭއްވިއިރު، ކޮމިޓީން ވަނީ ބިލް ދިރާސާކުރުމަށް މީޑިއާގެ މުއައްސަސާ އާއި ކަމާބެހޭ މުއައްސަސާތައް ހާޒިރުކޮށް އެފަރާތްތަކުގެ ރައުޔު ހޯދުމަށް ނިންމާފައެވެ. އެގޮތުން ކޮމިޓީއަށް ހާޒިރުކުރުމަށް ނިންމާފައިވަނީ، މޯލްޑިވްސް މީޑިއާ ކައުންސިލާއި، މޯލްޑިވްސް ބްރޯޑްކާސްޓިން ކޮމިޝަނާއި، ހިއުމަން ރައިޓްސް ކޮމިޝަނުގެ އިތުރުން ޔޫތް މިނިސްޓްރީ އާއި ރަޖިސްޓަރޑް މީޑިއާތަކެވެ.

ރައްޔިތުންގެ މަޖިލީހަށް މީޑިއާ ކޮންޓްރޯލްކުރުމުގެ ބިލެއް ހުށަހަޅާފައިވަނީ ތުޅާދޫ ދައިރާގެ މެމްބަރު އަބްދުލްހަންނާން އަބޫބަކުރެވެ. މީޑިއާ ކޮންޓްރޯލް ކުރުމާ ބެހޭ ބިލް މައްސަލާގައި މީޑިއާތަކުގެ ކަންބޮޑުވުން ފާޅުކޮށް ބިލް ބޭރުކުރުމަށް ގޮވާލާފައިވާއިރު، މިކަމާ ގުޅިގެން އިހުތިޖާޖުތައްވެސް ދަނީ ކުރަމުންނެވެ.