ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަނުން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދިއްޖެ އެވެ.
ފުލުހުން މިއަދު ބުނީ ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަނުން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް ދިވެހި ފުލުހުންގެ ހިދުމަތުން އޮގަސްޓު 28 ވަނަ ދުވަހު، ޕްރޮސެކިއުޓާ ޖެނެރަލްގެ އޮފީހަށް ވަނީ ހުށަހަޅާފަ އެވެ.
މިއީ ފަލާހުއާ ގުޅޭ މައްސަލަ އެކެވެ. މަޖިލީހުގެ ޖަލްސާއެއްގައި ފަލާހު ވަނީ ނޫސްވެރީން އުލުބައިދަން ޖެހޭ ކަމަށް ތަކުރާރުކޮށް ވިދާޅުވެފަ އެވެ. އޭނާގެ އެ ވާހަކަތަކަށް ވަރަށް ގިނަ ބަޔަކު ދަނީ ފާޑުކިޔަމުންނެވެ. އަދި އެކަން ނޫސްވެރީންނާއި މީޑިއާތަކާއި މީޑިއާތަކުގެ ބެލެނިވެރި ފަރާތްތަކުން ވަނީ ކުށްވެރި ކޮށްފަ އެވެ.
އޭނާ އަނިޔާވެރި އެ އަމަލަށް ގޮވާލީ އޭނާއާ ގުޅޭ ދޮގު ވާަހަކަތަކެއް ފެތުރި ކަމަށް ބުނެ އެވެ. ނަމަވެސް އެ ބުނާ ވާހަކަތަކެެއް ބަޔަކު ފެތުރީ ސޯޝަލް މީޑިއާގަ އެވެ.
ފަލާހްގެ އެ މައްސަލަ ބައްލަވާނެ ކަމަށް ރައީސް މުޢިއްޒުވެެސް ވަނީ ވިދާޅުވެފަ އެވެ. އަދި ވިދާޅުވީ އެފަދަ އަނިޔާވެރި އަމަލުތަކަށް ގޮވާ ނުލެވޭނެ ކަމަށެވެ.
މަޖިލީސް މެންބަރެއް ވިޔަސް އެފަދަ ގާނޫނާ ޚިލާފު ގޮވާލުމަކަށް ގޮވާލުމަކީ ހިފާ ހައްޔަރުކޮށް ތަހުގީގު ހިންގާ ދައުވާ އުފުލޭނެ ކަމެއް ކަމަށް ގާނޫނީ މާހިިރުން ގެންދަވަނީ ވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
