ރައްޔިތުންގެ މަޖިލީހުގެ މެންބަރުންގެ ތެރެއިން މާލީ ބަޔާން ހުށަނާޅާ މެންބަރުންނަށް ނޯޓިސް ދީފި އެވެ.

މަޖިލީހުގެ އިދާރާއިން މިއަދު ބުނީ މާލީ ބަޔާން ހުށައެޅުމުގެ ފަހު ތާރީހަކީ މިދިޔަ މަހުގެ ފަހު ދުވަހެވެ. ނަމަވެސް ފަސް މެންބަރަކު މާލީ ބަޔާން ހުށަނާޅާ ކަމަށެވެ. އެ މެންބަރުންނަށް މިހާރު އެކަން އަންގާ 15 ދުވަސް ތެރޭ މާލީ ބަޔާން ހުށައަޅަން އަންގާފައިވާ ކަމަށް ވަނީ ބުނެފަ އެވެ.

މަޖިލީހުގެ ގަވާއިދުގެ ދަށުން މެންބަރުންގެ މާލީ ބަޔާން ހުށައަޅާ އަދި އެ ބަޔާންތައް މަޖިލީހުގެ އިދާރާ އިން އާންމު ކުރަން ޖެހެ އެވެ. 

މާލީ ބަޔާން ހުށައެޅި މެންބަރުންގެ މާލީ ބަޔާންތައް މަޖިލީހުގެ އިދާރާ އިން އިއްޔެ ވަނީ އާންމުކޮށްފަ އެވެ. މާލީ ބަޔާންތަކަށް ބަލާއިރު ބައެއް މެންބަރުންގެ އެކައުންޓްގައި އެއްވެސް ފައިސާއެއް ނެތެވެ. ބައެއް މެންބަރުންގެ އެކައުންޓް ވަނީ މައިނަސް ގަ އެވެ. ވަރަށް މަދު އަދަދެއްގެ ފައިސާ ކޮޅަކާއި މުދާ ހުރި މެންބަރުން ވެސް ހިމެނެ އެވެ.

މެންބަރުންގެ މާލީ ބަޔާންތަކަށް ބަލާއިރު ބައެއް މެންބަރުންނަށް ހަދިޔާގެ ގޮތުގައި ވަރަށް ގިނަ އަދަދަކަށް ފައިސާ ލިބިފައިވާ ކަމަށް ދައްކަ އެވެ. 

އެއް މެންބަރަކީ މަޖިލީހުގެ ރައީސް އަބްދުއްރަހީމް އެވެ. އަބްދުއްރަހީމްގެ މާލީ ބަޔާނުގައިވާ ގޮތުން 958،982 ރުފިޔާ އަކީ ހަދިޔާ ގޮތުގައި ލިބިފައިވާ ފައިސާ އެވެ. އެ ފައިސާ ލިބުނީ ކާކުގެ ފަރާތުން ކަމެއް ސާފެއް ނުވެ އެވެ.

ހުޅުމާލޭ ދެކުނު ދާއިރާގެ މެމްބަރު އަހުމަދު ޝަމްހީދަށް ވެސް 1.4 މިލިއަން ރުފިޔާ ހަދިޔާގެ ގޮތުގައި ލިބިފައިވާ ކަމަށް އޭނާގެ މާލީ ބަޔާނުގައި ބުނެފައިވެ އެވެ. އޭގެ ތެރެއިން ބައެއް ފައިސާއަކީ ޑޮލަރުން ލިބުނު ފައިސާ އެވެ.

މީގެ އިތުރުން ބައެއް މެންބަރުންގެ އަމިއްލަ ބިން ބިމާއި ރޯ ހައުސްއާއި ފްލްޓް ހުރި ކަމަށް ވެސް މާލީ ބަޔާންތަކުގައިވެ އެވެ. ބައެއް މެންބަރުންނަށް ފްލެޓާއި ރޯ ހައުސް ލިބިފައިވަނީ މީހެއްގެ ފަރާތުން ހިލެ އެވެ. ބައެއް މެންބަރުން ފްލެޓް ގަނެފައިވަނީ ލޯނު ނަގައިގެންނެވެ.