02 ޑިސެމްބަރު 2025 އިން 06 ޑިސެމްބަރު 2025 އަށް ރާއްޖޭގައި ބޭއްވުމަށް ހަމަޖެހިފައިވާ 07 ވަނަ ކެރަމް ވޯލްޑްކަޕްގައި ވާދަކުރާ ދިވެހި ޤައުމީ ޓީމު އެކުލަވާލުމަށް ކުރިއަށްގެންދާ ސެލެކްޝަންގައި ފިރިހެން ޤައުމީ ޓީމުގެ ފުރަތަމަ ޖާގަ އިބްރާހީމް ހުޖާން އަލީ ހޯދައިފިއެވެ.
މިއަހަރުގެ ޤައުމީ މުބާރާތުގެ ފިރިހެން ސިންގަލްސް ޗެންޕިއަން ހުޖާން ވޯލްޑްކަޕްގެ ޖާގައެއް ކަށަވަރުކުރީ ކޮލިފައިންގައި ވާދަވެރި ކުޅުމަކަށްފަހު ފަހަތުން އަރައި 2-1 ގެ ނަތީޖާއަކުން އިސްމާއީލް އަޒްމީން ބަލިކުރުމަށްފަހު އެވެ.
މެޗުގެ ފުރަތަމަ ސެޓް ފަސޭހަކަމާއެކު 25-00 ގެ ނަތީޖާއަކުން އަޒްމީން ކާމިޔާބުކުރި ނަމަވެސް ޖެހިގެންއައި ދެސެޓް 21-19 އަދި 21-20 ގެ ނަތީޖާއަކުން ކާމިޔާބުކުރީ ހުޖާން އެވެ. އަދި މި އަހަރުގެ ގައުމީ މުބާރާތުގެ ފައިނަލުގައި ވެސް ހުޖާން ޗެންޕިއަންކަން ހޯދީ އަޒްމީން ބަލިކުރުމަށްފަހު އެވެ.
ގައުމީ ޓީމުގެ ސެލެކްޝަންސް ހުޅުމާލެ ކެރަމް އެރީނާގައި ފެށިގެން ކުރިއަށްދާއިރު ފިރިހެން އަދި އަންހެން ކޮންމެ ޓީމަކަށް 5 ކުޅުންތެރިން ހޮވުމަށް ވަނީ ހަމަޖެހިފައެވެ.
މި މަހުގެ އެއްވަނަ ދުވަހުން ފެށިގެން އަށްވަނަ ދުވަހަށް ކުރިއަށްދާ މި ސެލެކްޝަންސްގައި 31 ފިރިހެން ކުޅުންތެރިން އަދި 18 އަންހެން ކުޅުންތެރިއަކު އަންނަނީ ވާދަކުރަމުންނެވެ.
Advertisement
This content is created and paid for by advertisers and does not involve Voice Journalists
