ވޯލްޑްކަޕް ކޮލިފައިންގް ގުރޫޕް އޭގައި ރޭ ރަށުން ބޭރުގައި ސްލޮވާކިއާ ދެކޮޅަށް ޖަރުމަނު ކުޅުނު މެޗު 2-0 ގެ ނަތީޖާއަކުން ސްލޮވާކިއާ އިން ކާމިޔާބުކޮށްފިއެވެ.

މިގުރޫޕްގައި ރޭ ކުޅުނު ދެވަނަ މެޗުގައި ލަގްޒަމްބާގް އަތުން 3-1 ގެ ނަތީޖާއަކުން ނޮދަން އަޔަލޭންޑް މޮޅުވެފައިވާއިރު، ލަނޑުގެ ތަފާތުން ގުރޫޕްގެ އެއްވަނައިގައި މިވަގުތު އޮތީ ނޮދަން އަޔަލޭންޑް އެވެ. ދެވަނައިގައި ސޮލަވާކިއާ އޮތްއިރު، ތިންވަނައިގައި މިވަގުތު އޮތީ ލަގްޒަމްބާގް އެވެ. އަދި ޖަރުމަނު މިވަގުތު އޮތީ ގުރޫޕްގެ ފުލުގައެވެ.

ޖަރުމަނުން އެންމެ ފަހުން ކުޅުނު ޔުއެފާ ނޭޝަންސް ލީގު ތިންވަނަ ހޮވި މެޗުގައި ފުރާންސް އަތުން 2-0 ގެ ނަތީޖާއަކުން ބަލިވެފައިވާއިރު، ސްލޮވާކީއާ އެންމެ ފަހުން ކުޅުނު މެޗުގައި އިޒްރޭލް އަތުން އެޓީމު ބަލިވީ 1-0 ގެ ނަތީޖާއަކުނެވެ. އަދި މިދެޓީމު އެންމެ ފަހުން ކުޅުނު މެޗު 3-0 ގެ ނަތީޖާއަކުން ކާމިޔާބުކުރީ ޖަރުމަނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު ސޮލަވާކިއާ އިން މެޗުގެ ލީޑިހޯދީ ފުރަތަަމަ ހާފުގެ 42 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު ޑޭވިޑް ހެންކޯ އެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 55 ވަނަ މިނެޓުގައި ކާމިޔާބުކޮށްދިނީ ފޯވާޑް ޑޭވިޑް ޑޭވިޑް ސްޓްރެލެކް އެވެ.

މެޗުގެ ދެވަނަ ހާފުގައި ޖަރުމަނުން ކުޅުން ރަނގަޅުކޮށް ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 2-0 ގެ ނަތީޖާއަކުން ސްލޮވާކިއާ ކުރީގައި އޮވެގެންނެވެ.

މީގެ އިތުރުން މިއީ ނުވަ އަހަރަށް ފަހު ޖަރުމަނު އަތުން ސްލޮވާކިއާ މޮޅުވި ފުރަތަމަ ފަހަރެވެ. އަދި ޖަރުމަނު އެންމެ ފަހުން ކުޅުނު ހަތަރު މެޗުން އެޓީމަށް މޮޅެއް ހޯދިފައި ނުވާއިރު މިއީ އެޓީމު ޖެހިޖެހިގެން ބަލިވި ތިންވަނަ މެޗެވެ.