ވޯލްޑްކަޕް ކޮލިފައިންގ ގުރޫޕް ޑީގައި ރޭ ރަށުން ބޭރުގައި 2-0 ގެ ނަތީޖާއަކުން ޔުކްރެއިން އަތުން ފްރާންސް މޮޅުވި މެޗުގައި ކާމިޔާބުކުރި ލަނޑާއެކު ފްރާންސްގެ ޤައުމީ ޓީމަށް ދެވަނައަށް އެންމެ ގިނަ ލަނޑުޖަހާފައިވާ ތިއެރީ ހެންރީގެ ރެކޯޑާއި، އެމްބާޕޭ އަރައި ހަމަކޮށްފިއެވެ.

ފްރާންސް އިން އެންމެ ފަހުން ކުޅުނު މެޗުގައި ޖަރުމަނު އަތުން 2-0 ގެ ނަތީޖާއަކުން މޮޅުވެފައިވާއިރު، ޔުކްރެއިން އެންމެ ފަހުން ކުޅުނު މެޗުގައި ނިއުޒިލޭންޑް އަތުން އެޓީމު މޮޅުވީ 2-1 ގެ ނަތީޖާއަކުންނެވެ. އަދި މިދެޓީމު އެންމެ ފަހުން ކުޅުނު ދެމެޗު ވެސް ނިމިފައިވަނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ފުރަތަމަ ހާފުގައި މޮޅަށް ކުޅެ ފްރާންސް އިން މެޗު ޑޮމިނޭޓްކުރިއިރު، މެޗުގެ 10 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑުހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ބަޔާން މިއުނިކް ފޯވާޑް މައިކަލް އޮލީސޭ އެވެ. މިއީ އެޓީމުގެ ޕީއެސްޖީ ފޯވާޑް ބްރެޑްލީ ބާކޯލާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ފްރާންސް އިން ވަނީ ޔުކްރެއިންގެ ގޯލަށް ގިނަ ހަމަލާތަކެއް ފޮނުވާލާފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ޔުކްރެއިންއަަށް ލިބުނު ފުރުސަތުތަކުގެ ބޭނުން ނުކުރެވިދިޔައިރު، ފުރާންސް އިން ލީޑު ފުޅާކުރީ ފަހުހާފުގެ 82 ވަނަ މިނެޓިގައެވެ.

މިލަނޑު އެޓީމުގެ ރެއާލް މެޑްރިޑްގެ ފޯވާޑް ކިލިއަން އެމްބާޕޭ ކާމިޔާބުކުރީ އެޓީމުގެ ރެއާލް މެޑްރިޑްގެ މިޑްފީލްޑަރު ޗުއެމިނީ ތަނަވަސްކޮށްދިން ފުރުސަތެއްގައެވެ. މިއީ ފްރާންސްގެ ޤައުމީ ޓީމަށް ކުޅުނު 91 މެޗުގައި އޭނާ ކާމިޔާބުކުރި 51 ވަނަ ލަނޑެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މިނަތިޖާއެކު ގުރޫޕްގެ އެއްވަނައިގައި ފްރާންސް މިވަގުތު އޮތްއިރު، މިމެޗުން ބަލިވި ޔުކްރެއިން މިވަގުތު އޮތީ ގުރޫޕްގެ ފުލުގައެވެ. އަދި މިދެޓީމުގެ އިތުރުން މިގުރޫޕްގައި ދެން ހިމެނެނީ އައިސްލޭންޑް އަދި އަޒަރުބައިޖާންއެވެ.