އައްޑޫސިޓީގެ ރަށްތަކުން ރޭ މެންދަމުގެ ވަގުތެއްގައި ކަރަންޓް ކަނޑައިގެން ދިޔައީ، 41 ނަންބަރު ސަބްސްޓޭޝަނުގެ ކޭބަލަކަށް މީހަކު ގެއްލުންދޭން އުޅުމުގެ ތެރޭގައި ކަރަންޓް ޝޯޓެއް ހިނގައިގެންކަމަށް ފެނަކައިން ބުނެފިއެވެ.
ރޭ މެންދަމު ގާތްގަނޑަކަށް 2:40 ހާއިރު އައްޑޫސިޓީގެ ގުޅިފައިވާ ރަށްތަކުން ވަނީ ކަރަންޓް ކަނޑައިގެންދިޔަ ހާދިސާއާ ގުޅޭގޮތުން ފެނަކައިން ބުނީ، މައްސަލަ ދިމާވި ސަބަބު ދެނެގަތުމަށް ކުރި މަސައްކަތުން އެނގުނުގޮތުގައި ކަރަންޓް ކަނޑައިގެން ދިޔައީ ކޭބަލެއް ބުރިކުރަން އުޅުމުގެ ތެރޭގައި ކަރަންޓް ޝޯޓެއްވެގެން ކަމަށާައި، މި މައްސަލާގައި އިތުރަށް ބަލަންޖެގޭ ކަންކަން ސަރުކާރުގެ ކަމާބެހޭ އިދާރާތަކާ ގުޅިގެން ކުރިއަށްދާކަމަށެވެ.
ފެނަކައިން ބުނީ ކަރަންޓް ކަނޑައިގެން ދިއުމުން ވަގުތުން އެކުންފުނީގެ މުއައްޒަފުން އެ މައްސަލަ ހައްލުކުރުމަށް މަސައްކަތް ފެށިކަމަށެވެ. އަދި ކުރެވުނު މަސައްކަތްތަކުން ރޭ 05:55 ހާއިރު މުޅި އައްޑޫސިޓީއަށް ކަރަންޓްގެ ހިދުމަތް އަލުން ދެވުނުކަން ފެނަކައިން ވަނީ ފާހަގަކޮށްފައެވެ.
ފެނަކައިން ބުނީ އަޅާފައިހުންނަ ކޭބަލްތައް ބުރިކުރަން އުޅުމަކީ ކުންފުނީގެ މުދަލަށް ގެއްލުންލިބުމާއި، އާއްމު ރައްޔިތުންނަށް އެކަމުގެ ތަކްލީފް ލިބުމުގެ އިތުރުން އެފަދަ އަމަލެއް ކުރާ ފަރާތްތަކަށާއި، ނުވަތަ އަމަލުގައި ބައިވެރިނުވާ ފަރާތްތަކުގެ ހަށިގަނޑާއި ފުރާނައަށް ނުރައްކާވެދާނެ ކަންކަން ކަމަށްވުމުން މިފަދަ އަމަލުތައް ނުކުރުމަށް ނަސޭހަތްތެރިވާކަމަށެވެ.
ފެނަކައިން ވަނީ އައްޑޫސިޓީގައި ދެމުންދާ ކަރަންޓްގެ ހިދުމަތަށް ދާއިމީ ހައްލެއް ހޯދުމުގެ މަސައްކަތް ހުއްޓާނުލައި ކުރިއަށްދާނޭކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
