ބައިނަލްއަގުވާމީ އެކުވެރިކަމުގެ މެޗެއްގައި މިއަދު ހަވީރު ދިވެހިރާއްޖެ އާއި ސްރީލަންކާ ވާދަކުރި މެޗު ފަސޭހަކަމާއެކު 3-0 ގެ ނަތީޖާއަކުން ކާމިޔާބުކޮށް ރާއްޖެ އިން ލަންކާ އަތުން ބަލިނުވެ ދަމަހައްޓަމުން އަންނަ ރެކޯޑް ދަމަހައްޓައިފިއެވެ.

ރާއްޖޭގެ ޤައުމީ ޓީމު އެންމެ ފަހުން ކުޅުނު ފަސް މެޗުން ވެސް ބަލިވެފައިވާއިރު، އެންމެ ފަހުން ދިވެހި ޓީމު މޮޅުވެފައިވަނީ 2024 ވަނަ އަހަރު ނޮވެމްބަރު މަހު ބަންގްލަދޭޝް އަތުންނެވެ. އަދި ލަންކާ އެންމެ ފަހުން ކުޅުނު ފަސް މެޗުގެ ތެރެއިން ތިން މެޗުން މޮޅުވެފައިވާއިރު، ދެމެޗުން ވަނީ ބަލިވެފައެވެ. އަދި މިދެޓީމު އެންމެ ފަހުން ކުޅުނު މެޗު 1-0 ގެ ނަތީޖާއަކުން ކާމިޔާބުކުރީ ދިވެހިރާއްޖެ އިންނެވެ.

މެޗުގެ ފުރަތަމަ ހާފުގައި ރާއްޖެ އިން ދެލަނޑުގެ ލީޑެއް ހޯދިއިރު، ފުރަތަމަ ލަނޑު 28 ވަނަ މިނެޓުގައި ކާމިޔާބުކޮށްދިނީ ހަސަން ނާއިޒް (ދާދު)އެވެ. އަދި އޭގެ ހަތް މިނެޓްފަހުން ރާއްޖެއަށް ލީޑު ފުޅާކޮށްދިނީ އިބްރާހިމް މަހުދީ ހުސެއިން (ފޭދޫ އިއްބެ)އެވެ. އަދި ރާއްޖޭގެ ތިންވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ތަޖްރިބާކާރު ފޯވާޑް އަލީ ފާސިރު (ސެންޓޭ) އެެވެ.

މެޗުގެ ދެވަނަ ހާފުގައި ލަންކާ އިން އެޓީމުގެ ކުޅުން ރަނގަޅުކޮށް އެޓޭކުތައް ވަރުގަދަކުރިއިރު، މިހާފުގައި އެޓީމަށް ވަނީ ޕެނަލްޓީ އެއްވެސް ލިބި ބޭނުންކުރެވޭގޮތް ނުވެފައެވެ. އަދި މިދެޓީމުގެ މެޗުގައި ކުޅޭ ދެވަނަ މެޗު ކުޅުމަަށް ހަމަޖެހިފައިވަނީ އަންގާރަ ދުވަހުގެ ހަވީރު ރާއްޖެ ގަޑިން 16:30 ގައެވެ.

2006 ވަނަ އަހަރު ސާފް ޗެންޕިއަންޝިޕް ގުރޫޕް ސްޓޭޖުގައި 1-0 ގެ ނަތީޖާއަކުން ރާއްޖެ އަތުން މޮޅުވި ފަހުން ފާއިތުވެދިޔަ 19 އަހަރު ތެރޭގައި ރާއްޖެ އަތުން ލަންކާއަށް މޮޅެއް ހޯދިފައެއްނުވެއެވެ. އަދި 2005 ވަނަ އަހަރުން ފެށިގެން ފާއިތުވެދިޔަ 20 އަހަރު ތެރޭގައި މިދެޓީމު 10 ފަހަރު ވާދަކޮށްފައިވާއިރު، އޭގެ ތެރެއިން ހަ މެޗުން ރާއްޖެ މޮޅުވެފައިވާއިރު، ލަންކާ މޮޅުވެފައިވަނީ އެންމެ މެޗަކުންނެވެ. އަދި އަނެއް ތިން މެޗު ނިމިފައިވަނީ ދެޓީމު އެއްވަރުވެފައި އޮވެގެންނެވެ.

މީގެ އިތުރުން އެ 10 މެޗުގައި ރާއްޖެއިން 32 ލަނޑު ކާމިޔާބުކުރިއިރު، ލަންކާއަށް ކާމިޔާބުޖުރެވިފައިވަނީ އެންމެ ހަތް ލަނޑެވެ. އޭގެ ތެރޭގައި ބައިނަލްއަގުވާމީ އެކުވެރިކަމުގެ މެޗެއްގައި 2021 ވަނަ އަހަރު ރާއްޖެއާއި ވާދަކޮށް 4-4 ގެ ނަތީޖާއަކުން އެއްވަރުވި މެޗުގައި އެޓީމުން ކާމިޔާބުކުރި ހަތަރު ލަނޑު ހިމެނެއެވެ.