މިހާރު ކުރިއަށްދާ އިންޓަނޭޝަނަލް ބްރޭކުގައި ފުރާންސް ގައުމީ ޓީމަށް ކުޅެނިކޮށް ޔޫރަޕްގެ ޗެންޕިއަން ޕީއެސްޖީގެ އެންމެ މުހިންމު ދެކުޅުންތެރިންކަމަށްވާ ޑިޒައޭ ޑޫއޭ އަދި އުސްމާން ޑެމްބެލޭއަށް އަނިޔާވެއްޖެއެެވެ.
މި ދެ ކުޅުންތެރިންނަށް އަނިޔާވީ ހުކުރު ދުވަހު ކުޅުނު ވޯލްޑް ކަޕް ކޮލިފައިންގައި 2-0 ގެ ނަތީޖާއަކުން ޔުކްރެއިން އަތުން ފުރާންސް މޮޅުވި މެޗުގައެވެ. މި އަނިޔާގެ ސަބަބުން ޑެމްބެލޭ ހަ ހަފްތާއަށް ކުޅުމާއި ދުރުގައި ހުންނަންޖެހިފައިވާއިރު، ޑޫއޭއަށް ހަތަރު ހަފްތާ ގެއްލޭނެއެވެ.
މީގެ ސަބަބުން މިމަހުގެ 17 ވަނަ ދުވަހު ޗެންޕިއަންސް ލީގުގައި އިޓަލީގެ އެޓެލާންޓާއި ދެކޮޅަށް ކުޅޭ މެޗާއި އޮކްޓޯބަރު މަހުގެ އެއްވަނަ ދުވަހު ސްޕެއިންގެ ބާސެލޯނާއި ދެކޮޅަށް ޗެންޕިއަންސް ލީގުގައި ޕީއެސްޖީ ކުޅޭ ދެމެޗުގައި މިދެކުޅުންތެރިންނަށް ބައިވެރި ނުވެވޭނެކަން ވަނީ ކަށަވަރުވެފައެވެ.
ޑެމްބެލޭ އަދި ޑޫއޭ އަކީ މިދިޔަ ސީޒަނުގައި ޕީއެސްޖީ އިން ހޯދި ކާމިޔާބީގައި އެންމެ މުހިންމު ދައުރެއް އަދާކުރި ދެކުޅުންތެރިންނެވެ. އަދި ޑެމްބެލޭ އަކީ މިއަހަރު ބެލެންޑިއޯ އެވޯޑަށް ވާދަކުރާ ކުޅުންތެރިން ލިސްޓުގެ އެންމެ ކުރީގައި އުޅޭ އެއްކުޅުންތެރިއާ އެވެ.
މީގެ އިތުރުން ޤައުމީ ޓީމު ޑިއުޓީގައި މިދެކުޅުންތެރިންނަށް އަނިޔާ ވުމުން ޕީއެސްޖީގެ މެނޭޖްމަންޓުން ވަނީ ހިތްހަމަ ނުޖެހުން ފާޅުކޮށް ފުރާންސްގެ ފުޓްބޯޅަ ފެޑެރޭޝަނަށް ސިޓީއެއް ވެސް ފޮނުވައިފިއެވެ. މި ސިޓީގައި ފްރާންސްގެ ގައުމީ ޓީމާ ޕީއެސްޖީ އާދެމެދު ކުޅުންތެރިންގެ ކަންކަމުގައި ގުޅުން ރަނގަޅުކުރުމަށް ވަނީ އެދިފައިވެއެވެ.
⁵
Advertisement
This content is created and paid for by advertisers and does not involve Voice Journalists
