އަންނަ ހޯމަ ދުވަހު، ރައްޔިތުންގެ މަޖިލީހުގެ ޖަލްސާއެއް ދައުރުން ބޭރުން ބޭއްވުމަށް މަސައްކަތް ކުރަމުން އަންނަ މައުލޫމާތު ލިބިއްޖެއެވެ.
ވެރިކަންކުރާ މައި ޕާޓީ، ޕީއެންސީގެ މެންބަރަކު "ވޮއިސް"އަށް ވިދާޅުވީ، މި އަންނަ ހަފުތާގެ ތެރޭގައި ދައުރުން ބޭރުން ދެ ޖަލްސާއެއް ބޭއްވުމުގެ މަސައްކަތް ކުރަމުން އަންނަ ކަމަށެވެ. ނަމަވެސް އެ ޖަލްސާގެ އެޖެންޑާގެ މައުލޫމާތު އަދި ސާފުނުވާ ކަމަށް އެ މެންބަރު ވިދާޅުވިއެވެ.
"ވޮއިސް" އަށް އެނގިފައިވާ ގޮތުގައި، އަންނަ ހަފުތާގެ ޖަލްސާއަށް ހުށަހަޅާފައިވަނީ އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު، އިބްރާހިމް ފަލާޙް މަޖިލީހަށް ހުށަހަޅުއްވާފައިވާ ރެފަރެންޑަމް ބިލުގެ މަސައްކަތެވެ.
އަންނަ ހޯމަ ދުވަހު ޖަލްސާއެއް ބޭއްވުމަށް ނިންމާފައިވާއިރު، އެ ދުވަހަކީ މިހާރު މަޖިލީހުގެ ކޮމެޓީ މިނިވަން މުއައްސަސާތަކާ ބެހޭ ކޮމެޓީން ދިރާސާކުރަމުން އަންނަ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލުގެ ސުންގަޑި ވެސް ކަނޑައަޅާފައިވާ ދުވަަހެވެ. އެ ދުވަހަށް އެ ބިލުގެ މަސައްކަތްތައް ނިންމާލެވިއްޖެ ނަމަ، އެ ދުވަހު އެ ބިލު ފާސްކުރުން ވެސް ވަރަށް އެކަށީގެންވެއެވެ.
އެގޮތުން އެ ބިލު ބަލައިގަނެ، ބަހުސްކޮށް ކޮމެޓީ އަށް ވެސް ފޮނުވާފައިވަނީ ދައުރުން ބޭރުން މިދިޔަ މަހުގެ 27 ވަނަ ދުވަހު ބޭއްވި ޖަލްސާގައެވެ.
Advertisement
This content is created and paid for by advertisers and does not involve Voice Journalists
