އުރީދޫއިން ރާއްޖެއަށް ދެމުން އަންނަ އިންޓަރނެޓް ހިދުމަތުގައި މައްސަލައެއް ނޫޅޭކަމަށް އެކުންފުނީގެ ސީއީއޯ ހުސައިން ނިޔާޒް ވިދާޅުވެއްޖެއެވެ.
ރެޑްސީގައި އަޅާފައިއޮތް އިންޓަރނެޓް ސަބްމެރިން ކޭބަލެއް ބުރިވުމުގެ ސަބަބުން އޭޝިއާ ސަރަހައްދުގެ އިތުރުން މެދުއިރުމައްޗާއި ޔޫރަޕްގެ ބައެއް ހިސާބުތަކަށް އިންޓަރނެޓް ލިބުމުގައި ދަތިތަކެއް އުޅޭކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ.
އެކަމުގެ ސަބަބުން ރާއްޖޭގައި އިންޓަރނެޓް ބޭނުންކުރުމުގައި މައްސަލައެއް އުމާވެދާނެތޯ ބައެއް ފަރާތްތަކުން ވަނީ ސޯޝަލް މީޑިއާގައި ޓެލްކޮމް ހިދުމަތްދޭ ފަރާތްތަކަށް ސުވާލު އަމާޒުކޮށްފައެވެ.
މިކަމާ ގުޅިގެން ނިޔާޒް ވިދާޅުވީ އުރީދޫއިން ދެމުންގެންދާ އިންޓަރނެޓްގެ ހިދުމަތަށް އެއްވެސް މައްސަލައެއް ދިމާނުވާކަމަށެވެ. ނިޔާ ވިދާޅުވީ އުރީދޫއިން އަޅާފައިވާ ސަބްމެރިން ކޭބަލް ތައް ހުންނާނީ ސިންގަޕޫރު ފަދަ އެހެން ސަރަހައްދުތަކާ ގުޅާލެވިފައިކަމަށެވެ.
އެގޮތުން ސަބްމެރިން ކޭބަލް އަޅާފައި ހުންނާނީ އެއް ދިމާލުން މައްސަލައެއް ކުރިމަތިވި ނަމަވެސް އެހެން ސަރަހައްދުތަކުން ހައްލު ހޯދޭގޮތަށް ކަމަށް ނިޔާ ފާހަގަކުރެއްވިއެވެ.
ރެޑްސީގައި އަޅާފައިވާ ފައިބަރ ސަބްމެރިން ކޭބަލް ބުރިވުމުގެ ސަބަބުން އެންމެބޮޑަށް އެކަމުގެ އަސަރުކޮށްފައިވަނީ، މެދުއިރުމަތީގެ ޤައުމުތަކަށް ކަމަށެވެ. މީގެ ތެރޭގައި ކުވައިތު, ޔޫއޭއީ ފަދަ ޤައުމުތައް ފާހަގަކޮށްލެވެއެވެ. އަވައްޓެރި ބައެއް ޤައުމުތަކުގެ ތެރެއިން ޕާކިސްތާނަށްވެސް އިންޓަރނެޓް ބޭނުންކުރުމުގައި މައްސަލަ ދިމާވެފައިވާކަމަށް ބައެއް މީޑިއާތަކުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
