މިހާރު ރައްޔިތުންގެ މަޖިލީހަށް ހުށަހަޅާފައިވާ މީޑިއާތައް ރެގިއުލޭޓްކުރާ ބިލަށް ގިނަ ފަރާތްތަކެއްގެ ކޮމެންޓް ލިބިފައިވާއިރު، އެ ކޮމެންޓުތައް ފޮނުވި ފަރާތްތަކުގެ ޒާތީ މަޢުލޫމާތު ހާމަކުރަން ޖެހޭ ކަމުގައި ފާހަގަކޮށް އެ ބިލު ދިރާސާކުރާ ކޮމެޓީ ސިއްރުކޮށްފިއެވެ.
ދައުރުން ބޭރުން ކުރިޔަށްދާ މަޖިލީހުގެ މިނިވަން މުއައްސަސާތަކުގެ 31 ވަނަ ކޮމެޓީގައި ވަނީ މިހާރު މަޖިލީހަށް ހުށަހެޅިފައިވާ މޯލްޑިވްސް މީޑިޔާ އެންޑް ބްރޮޑްކާސްޓިން ރެގިއުލޭޝަން ބިލަށް ލިބިފައިވާ ޚިޔާލުތައް ދިރާސާކުރަން އެޖެންޑާކޮށްފައެވެ.
އޭގެ ކުރިން އެ ކޮމެޓީގައި ވަނީ ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ބިލުގެ މަސައްކަތްތައް ކުރިޔަށް ގެންގޮސްފައެވެ.
އެގޮތުން މީޑިޔާ ރެގިއުލޭޝަން ބިލުގެ ދިރާސާގެ މަސައްކަތްތައް ފެށުމާއެކު، ތުލުސްދޫ ދާއިރާގެ މެމްބަރު އިބްރާހިމް ނަސީމް ވަނީ އެ ބިލަށް ވަރަށް ގިނަ ކޮމެންޓުތައް ލިބިފައިވާކަން ފާހަގަކުރައްވައި، މިއަދު އެ މަސައްކަތް ނުނިންމޭނެ ކަމަށް ވިދާޅުވެފައެވެ.
އެގޮތުން މެންބަރު ވިދާޅުވީ ބައެއް މާއްދާތަކަށް ދިހަ، ބާރަ ކޮމެންޓު ވެސް ލިބިފައިވާ ކަމަށާއި، އެ ކޮމެންޓުތައް ދިރާސާކުރާ އިރު އެ ކޮމެންޓު ފޮނުއްވި ފަރާތާއި އެ ކޮމެންޓު ވެސް ބާރަށް ކިޔާނެ ކަމަށެވެ.
އެހެންކަމުން އެފަދައިން އެ ފަރާތްތަކުގެ ޒާތީ މަޢުލޫމާތު ހާމަކުރުމަކީ އެންމެ ރަނގަޅު ގޮތްތޯ މެންބަރު ވަނީ ސުވާލު އުފައްދަވައި، އެފަދަ މައުލޫމާތެއް ހާމަކުރައްވަން ބޭނުންފުޅު ނުވާކަން ފާހަގަކުރައްވާފައެވެ. އެހެންކަމުން އެ ކޮމެޓީ ސިއްރުކުރަން މެންބަރު ހުށަހަޅުއްވިއެވެ.
މެންބަރު ނަސީމުގެ އެ ހުށަހެޅުމަށް ތާޢީދުކުރައްވާފައިވަނީ ކެލާ ދައިރާގެ މެންބަރު އަބްދުﷲ ޝަރީފުއެވެ.
އެއާއެކު އެ ކޮމެޓީގެ މުޤައްރިރު މާފުށީ ދާއިރާގެ މެންބަރު ހުސައިން ރިޟާ ވަނީ އެ ކޮމެޓީ ސިއްރުކުރަން ވޯޓަށް އަހާފައެވެ. އެ ނިންމުމަށް ކޮމެޓީގެ މެންބަރުންގެ ޣައުލަބިއްޔަތު ލިބުނެވެ.
ފާހަގަކުރެވޭ ގޮތުގައި މަޖިލީހަށް ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު ހުށަހަޅުއްވާފައިވާ މީޑީޔާގެ ރެގިއުލޭޓަރީ ބިލާ ދެކޮޅަށް ވަރަށް ގިނަ ނޫސްވެރިން ވަނީ ޚިޔާލު ފާޅުކޮށްފައެވެ. އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.
އަދި އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
