ވޯލްޑްކަޕް ކޮލިފައިންގް ގުރޫޕް ކޭގައި މިރޭ ރަށުން ބޭރުގައި ފަސޭހަކަމާއެކު 5-0 ގެ ތަފާތުބޮޑު ނަތީޖާއަކުން ސާބިއާ ބަލިކޮށް އިންގްލޭންޑުން ގުރޫޕްގެ އެއްވަނައިގައި ހަތް ޕޮއިންޓްގެ ލީޑެއް ނަގައިފިއެވެ.

ކޮލިފައިންގައި އިންގްލެންޑް އެންމެ ފަހުން ކުޅުނު މެޗުގައި އެންޑޯރާ އަތުން 2-0 ގެ ނަތީޖާއަކުން މޮލުވެފައިވައިރު، ސަބިއާ އެންމެ ފަހުން ކުޅުނު މެޗުގައި އެޓީމުން ވަނީ 1-0 ގެ ނަތީޖާއަކުން ލެޓްވިއާ ބަލިކޮށްފައެވެ. އަދި މިދެޓީމު އެންމެ ފަހުން ކުޅުނު މެޗު 1-0 ގެ ނަތީޖާއަކުން ކާމިޔާބުކުރީ އިންގްލެންޑުންނެވެ.

މުޅި މެޗުގައި ވެސް މޮޅަށް ކުޅެ އިންގްލެންޑުން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 33 ވަނަ މިނެޓުގައެވެ. މިލަނޑު އެޓީމުގެ ކެޕްޓަން ހެރީ ކޭން ކާމިޔާބުކުރިއިރު، އޭގެ ދެމިނެޓް ފަހުން އެޓީމުގެ ލީޑު ފުޅާކޮށްދިނީ ނޯނީ މަޑުއެކޭ އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އިންގްލޭންޑް ކުރީގައި އޮވެގެންނެވެ.

މެޗުގެ ދެވަނަ ހާފު ވެސް އިންގްލޭންޑުން ވަރުގަދަކޮށް ފެށިއިރު، އެޓީމުގެ ތިންވަނަ ލަނޑު ފަހުހާފުގެ 52 ވަނަ މިނެޓުގައި ކާމިޔާބުކޮށްދިނީ ޑިފެންޑަރު އެޒްރީ ކޮންސާ އެވެ. އަދި މިމެޗުގައި ސާބިއާއަށް އިތުރު މައްސަލަތަކެއް ކުރިމަތިވި މެޗުގެ 72 ވަނަ މިނެޓުގައި އެޓީމުގެ ޑިފެންޑަރު ނިކޮލާ މިލެންކޮވިޗް ކުރި ނުރައްކާތެރި ފައުލަކާއި ގުޅިގެން މެޗުގެ ރެފްރީ އޭނާއަށް ސީދާ ރަތް ކާޑެއް ދައްކައި ދަނޑުން ފޮނުވާލުނުންނެވެ. މީއާއެކު މެޗުގެ ބާކީބައި ސާބިއާ އިން ފުރިހަމަކުރީ އެއްކުޅުންތެރިއަކު މަދުކޮށެވެ.

ސާބިއާ އިން އެއްކުޅުންތެރުއަކު މަދުވުމުގެ ފައިދާނަގައި އިންގްލެންޑުން އިތުރު ދެލަނޑު ކާމިޔާބުކުރިއިރު، މިމެޗުގައި އެޓީމުން ކާމިޔާބުކުރި ހަތަރުވަނަ ލަނޑު ފަހުހާފުގެ 75 ވަނަ މިނެޓުގައި ކާމިޔާބުކޮށްދިނީ ޑިފެންޑަރު މާކް ގުއެހީ އެވެ. އަދި އެޓީމުގެ ފަސްވަނަ ލަނޑު މެޗުގެ 90 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ފޯވާޑް މާކަސް ރަޝްފޯޑް އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ފަސް މެޗުން ވެސް މޮޅުވެ 15 ޕޮއިންޓާއެކު ގުރޫޕްގެ އެއްވަނައިގައި އިންގްލެންޑް އޮތްއިރު، މިމެޗުން ބަލިވި ސާބިއާ އިން ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ހަތް ޕޮއިންޓާއެކު އެޓީމު މިވަގުތު އޮތީ ގުރޫޕްގެ ތިންވަނައިގައެވެ.