ޤައުމީ ސްކައުޓް އިދާރާ އަދި ސްކައުޓް ފިހާރަ މިހާރު ހިންގަމުންދާ އަރަބިއްޔާ ސްކޫލުން އެތަން ހުސްކުރަން އަންގައިފިއެވެ.

ސްކައުޓް އެސޯސިއޭޝަނުން ސޯޝަލް މީޑީޔާގައި ކުރި ޕޯސްޓެއްގައި ބުނެފައިވަނީ މިއަދު ސްކައުޓް އެސޯސިއޭޝަން އިދާރާ އަދި ސްކައުޓް ފިހާރަ ހުސްކުރުމަށް އަންގާފައިވާތީއާ، އަދި މިވަގުތު ޤައުމީ ސްކައުޓް އިދާރާ އާއި ފިހާރަ ހިންގާނެ އިތުރު ތަނެއް ހަމަޖެހިފައިނުވާތީ، އިތުރު ތަނެއް ހަމަޖެހެންދެން ސްކައުޓްގެ އިދާރާ އަދި ފިހާރަ ވަގުތީ ގޮތުން ބަންދުކުރެވިފައިވާ ކަމަށެވެ. 

އަދި އެކަމުގެ ސަބަބުން ކުރިމަތިވެދާނެ ދަތިތަކަށް ސްކައުޓް އެސޯސިއޭޝަނުން ވަނީ މަޢާފަށް އެދިފައެވެ.

ސްކައުޓުން އެންމެ ފަހުން ތިބި އަރަބިއްޔާ ސްކޫލް

1956 ވަނަ އަހަރު، ރާއްޖޭގެ ސްކައުޓް ހަރަކާތްތައް ފެށުނު ފަހުން މިހާތަނަށް ވެސް ސްކައުޓް އެސޯސިއޭޝަނަށް ހަރަކާތްތައް ހިންގުމަށް އަދި ޤާއިމްވެ ތިބުމަށް ދާއިމީ އޮފީހެއް ލިބިފައެއް ނުވެއެވެ. އެގޮތުން މިހާތަނަށް އެ ހަރަކާތް ހިންގުމަށް، އިދާރީަ ގޮތުން ޤާއިމްވެ ތިބުމަށް ފަސް ފަހަރެއްގެ މަތިން ވަނީ ބަދަލުވެފައެވެ. އެގޮތުން:

- 1984 ވަނަ އަހަރު ސްކައުޓް އެސޯސިއޭޝަން އެކުލަވާލައި، އެ އެސޯސިއޭޝަން އެންމެ ފުރަތަމަ ހިންގީ ލިލީމަގުގައި އޭރު ހުރި ޔޫތު ސެންޓަރު ޢިމާރާތުގައި

- ފަހުން އެޢިމާރާތް މުލީއާގޭގެ ވެހިކަލް ގަރާޖަށް ބަދަލު ކުރުމަށް 1990ގެ މެދުތެރޭގައި މެދުޒިޔާރަތްމަގުގެ ހ. ބަންޑާރަވިލާގެ އަށް އެ އެސޯސިއޭޝަން ބަދަލުކުރި

- އޭގެ ފަހުން ކުރީގެ ރައީސް ޢަބްދުﷲ ޔާމީންގެ ވެރިކަމުގައި، 2017 ވަނަ އަހަރުގައި ބަންޑާރަވިލާއިން، ބައު ޖަމާލުއްދީން ސްކޫލުގެ ދެ ކިލާސް ރޫމަށް ބަދަލު ކުރި

- 2022ވަނަ އަހަރު ބައު ޖަމާލުއްދީން ތަޅާލަން ނިންމުމާއެކު އޭރު ހުސްކޮށް ހުރި "އެފްއޭއެމް ހައުސް" އަށް ބަދަލުކުރި

- އެފްއޭއެމް ޢިމާރާތް އެފްއޭއެމް އިން އަލުން ބޭނުންވެގެން 2023 ގެ ތެރޭގައި މިހާރު ހިންގާ ބައު ޢަރަބިއްޔާގެ ޢިމާރާތުގެ ބަޔަކަށް ސްކައުޓުން ބަދަލުކުރި

ބައު އަރަބިއްޔާ ސްކޫލުން ބަދަލުކުރަން ނިންމި ނިންމުމަކީ، ސްކައުޓުންގެ 69 އަހަރުގެ ތެރޭގައި އެ އެސޯސިއޭޝަނުގެ ހިންގުން ބަދަލުކުރަން ނިންމި ހަ ވަނަ ފަހަރެވެ.

"ވޮއިސް" އަށް މަޢުލޫމާތު ލިބިފައިވާ ގޮތުގައި މިހާތަނަށް ސްކައުޓުން ބަދަލުކުރަން ވަކިތަނެއް ކަނޑައަޅާފައެއް ނުވެއެވެ. 

އެގޮތުން އެކަމުގެ ކަންބޮޑުވުން ވަރަށް ގިނަ ސްކައުޓުން ފާޅުކުރަމުންދާއިރު، ޤައުމީ ސްކައުޓްގެ ކައުންސިލް މެންބަރު މުޖާހިދު އަބްދުﷲ، ވަނީ ސޯޝަލް މީޑިޔާގައި އެކަމުގެ ކަންބޮޑުވުން ހިއްސާކުރައްވާފައެވެ. އެގޮތުން މުޖާހިދު ވިދާޅުވީ، ބައި ގަރުނަށްވުރެ ގިނަ ދުވަސްވެފައިވާ ރާއްޖޭގެ ސްކައުޓް ހަރަކާޓް މިހާރު އޮތީ ގާތްގަޑަކަށް މަގުމަތިކޮށްލާފައިވާ ކަމށާއި، 1956 ވަނަ އަހަރުން ފެށިގެން ދިވެހި ޒުވާނުން ބިނާކުރުމުގައި ސްކައުޓުންގެ ހަރަކާތް ބޮޑު ކަމަށެވެ.

އެ ޕޯސްޓަށް ކޮމެންޓު ކުރައްވަމުން ސްކައުޓް އެސޯސިއޭޝަނުގެ ފައުންޑިން މެންބަރު އަދި ކުރީގެ ރައީސްކަން ވެސް ކުރެއްވި އަބްދުﷲ ރަޝީދު ވެސް ވަނީ އެކަމުގެ ކަންބޮޑުވުން ހިއްސާކުރައްވާފައެވެ.

އެގޮތުން ރަޝީދު ވިދާޅުވީ ސްކައުޓުގެ ޚިދުމަތަށް 45 އަހަރު، އަދި އޭގެ ތެރެއިން ޤައުމީ ފެންވަރުގައި ދަރުމަވެރިކަމުގެ މަސައްކަތް ކުރެއްވި ބޭފުޅެއްގެ ޙައިސިއްޔަތުން މިއަދު ރާއްޖޭގެ ސްކައުޓުންނަށް ދިމާވެފައިވާ ޙާލަތާ މެދު ހިތާމަކުރައްވާ ކަމަށެވެ.

އަދި ސްކައުޓުންގެ ޙާލަތު ސަރުކާރުގެ ސަމާލުކަމަށް ގެނެސް، އެކަމަށް ޙައްލެއް ވީހާ ވެސް އަވަހަކަށް ހޯދުމަށް ރަޝީދު ވަނީ ގޮވާލައްވާފައެވެ.