އަދުލުވެރިކަން ނުގެނެވިއްޖެނަމަ، އިތުރު ޤައުމުތަކުން އިހުތިޖާޖުކުރުންތައް ފެނިދާނެ: ނަޝީދު
އަދުލުވެރިކަމާއެކު ވެރިކަން ނުކުރެވިއްޖެނަމަ، އިތުރު ޤައުމުތަކުން އިހުތިޖާޖުކުރުންތައް ފެނިގެން ހިނގައިދާނެކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނޭޕާލްގެ ސިޔާސީ މަޝްރަހްގައި އިއްޔެ ފެނިގެންދިޔަ ކަންތައްތަކާ ގުޅިގެން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުތައް ހަމަނުޖެހުމާ ހިސާބަށް ދިއުމުގެ އަސްލުތަކުގެ ތެރޭގައި ހިމެނެނީ ވެރިކަން ގޯސްކޮށް ހިންގުމާއި، ކޮރަޕްޝަނުގެ އިތުރުން ދަރަނި ކަމަށެވެ. ނޭޕާލުން އެކަންކަން ފެންނަމުންދާކަން ފާހަގަކުރައްވަމުން ރައީސް ނަޝީދު ވިދާޅުވީ ތަރައްޤީވަމުން އަންނަ ޤައުމުތަކުން ރަނގަޅުގޮތުގައި ދަރަނި މެނޭޖް ނުކުރެވި، ވެރިކަން ރަނގަޅަށް ނުކުރެވިއްޖެނަމަ އިތުރު ޤައުމުތަކުގައި އިހުތިޖާޖުތައް ފެނިގެންދާނެކަމީ ޝައްކެއް އޮތްކަމެއް ނޫންކަމަށެވެ.
އެގޮތުން ރައީސް ނަޝީދު ވަނީ މިކަމަކީ ދުނިޔޭގެ ޤައުމުތަކުން ހޭލާންޖެހޭކަން ފާހަގަ ކުރައްވާފައެވެ.
ދުލުވެރިކަމާއެކު ވެރިކަން ނުކުރެވިއްޖެނަމަ، އިތުރު ޤައުމުތަކުން އިހުތިޖާޖުކުރުންތައް ފެނިގެން ހިނގައިދާނެކަމަށް ރައީސް ނަޝީދު ވިދާޅުވިއިރު، 2012 ވަނަ އަހަރުގެ ފެބުރުއަރީމަހު އެމަނިކްފާނުގެ ވެރިކަން ވެއްޓުނީ އަދުލުވެރިކަމުން އެއްކިބާވެ، ކުރެވުނު ކަންތައްތަކެއްގެ ސަބަބުންކަމަށް ބައެއް ފަރާތްތަކުން ފާހަގަކުރެއެވެ. އެގޮތުން ޤާނޫނާ ހިލާފަށް ގާޒީއަކު ރަހީނުކުރުމާއި، ސިފައިންނާއި ފުލުހުން ލައްވައި އުސޫލާ ހިލާފަށް ކަންކަން ކުރައްވަން މަސައްކަތް ކުރި ކުރުމަކީ ރައީސް ނަޗިދުގެ ވެރިކަން ފުރޮޅެން ދިމާވި ސަބަބުތަކުގެ ތެރޭގައި ހިމެނޭ ކަންކަން ކަމަށް ބައެއް ފަރާތްތަކުން ފާހަގަކުރެއެވެ.
ނޭޕާލްގެ ވެރިކަމުގައި އިސް ފަރާތްތައް މަގާމުން އިސްތިއުފާދީފައިވަނީ، ސޯޝަލް މީޑިއާ ބޭނުންކުރުން މަނާކުރުމަށް ނިންމުމާއި، ވެރިްނގެ ކޮރަޕްޝަން އިންތިހާއަށް ބޮޑުވެ، ޖެންޒީން ކުރި މުޒާހަރާތަކާ ގުޅިގެންނެވެ. މި މުޒާހަރާތައް އެންމެފަހުން ބޮޑު ހަމަނުޖެހުންތަކަކަށް ބަދަލުވެ އެތައް ބައެއްގެ ފުރާނަ ގެއްލި، އެޤައުމަށްވެސް ވަނީ ބޮޑެތި ގެއްލުންތަކެއް ލިބިފައެވެ.
Advertisement
This content is created and paid for by advertisers and does not involve Voice Journalists
