ސަރުކާރުން ދޮންފަނުގެ ބިން ހިއްކުން ކުރިއަށްނުގެންދިއުމަށް ނިންމުމުން، ދޮންފަނު ކައުންސިލުން އެރަށުގެ ފަރު ސަރަހައްދުގައި  މުޒާހަރާކުރުމަށް ނިންމައިފިއެވެ.

މިކަމާ ގުޅިގެން ދޮންފަނު ކައުންސިލުން މިއަދު ހެނދުނު ގެޒެޓްކުރި އިއުލާނެއްގައި ވަނީ އެރަށު ފަރު ސަރަހައްދުގައި މުޒާހަރާ ކުރުމަށް ނިންމާފައިވާކަން ހާމަކޮށްފައެވެ. މި އިއުލާނުގައި ދޮންފަނު ކައުންސިލުން ބުނެފައިވަނީ، އިހުތިޖާޖުކުރުމަށް ނިންމީ، ދޮންފަނު ބިންހިއްކުމަށްޓަކައި އެމްޓީސީސީއާ ހަވާލުކުރެވިފައިވާ ޕްރޮޖެކްޓުން ބިންހިއްކުމުގެބައި އުނިކޮށް ބިން ނުހިއްކާގޮތަށް ސަރުކާރުން ހަމަޖެއްސުމާއި ގުޅިގެން ކަމަށެވެ.

ދޮންފަނު ކައުންސިލުން ބުނީ މޫސުގައި ކުރިއަށްގެންދިއުމަށް ނިންމާފައިވާ މި މުޒާހަރާތައް ކުރިއަށްދާނީ، ދޮންފަނުގެ ފަރުންފެށިގެން 700 މީޓަރު ސަރަހައްދުގައި ކަނޑުމަތީގައިކަމަށެވެ. މިއީ ސިލްސިލާކޮށް ކުރިއަށްގެންދާނޭ މުޒާހަރާތަކެއް ކަމަށްވެސް ބުންޏެވެ.

ކައުންސިލުން ބުނީ މުޒާހަރާ ކުރިއަށްދާއިރު، ސަރަހައްދުގައި ފީނުމާއި ޑައިވްކުރުމަކީ ރައްކާތެރިކަމެއް ނުވާތީވެ، މިއަދުންފެށިގެން ދޮންފަނު ފަރުންފެށިގެން 700 މީޓަރު ސަރަހައްދުގައި އެއްވެސްފަރާތަކުން ފީނުމާއި އަދި ޑައިވުކުރުމަކީ މަނާކަމެއް ކަމަށެވެ. އަދި އެންގުމާ ހިލާފުވާފަރާތްތަކާމެދު ފިޔަވަޅު އެޅުމަށް ކަމާބެހޭ އިދާރާތަކަށް އަންގަމުންދާނެވާހަކަވެސް ދޮންފަނު ކައުންސިލުން ވަނީ ބުނެފައެވެ.

މިދިޔަ އަންގާރަދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ، ބ. ދޮންފަނުގެ ބިން ހިއްކުން ކުރިޔަށް ނުގެންދިއުމަށް ނިންމަވާފައެވެ. "އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، އެމަނިކުފާނު ރަށްރަށުގައި ކުރައްވާނެ ކަންކަމާ ބެހޭ ވަޢުދުތައް ވެވަޑައިގަންނަވަނީ އެ ރަށެއްގެ ރައްޔިތުންގެ ފަރާތުން އެކަންކަމަށް އެދުމުން ކަމަށާއި އެގޮތުން މިހާރު އެ މަސައްކަތްކުރުމަށް ރައްޔިތުން ބޭނުންނުވާކަން ރައްޔިތުންގެ ފަރާތުން އެމަނިކުފާނަށް އެނގިފައިވާކަމަށެވެ. 

ރައީސުލްޖުމްހޫރިއްޔާ އެގޮތަށް ނިންމެވިނަމަވެސް ދޮންފަނު ކައުންސިލުން ވަނީއެރަށުގެ ބިން ހިއްކުން ކުރިޔަށް ނުގެންދިއުމަށް ނިންމި ނިންމުން ބަދަލުކުރުމަށް ގޮވާލާފައެވެ. ކައުންސިލުން ނެރުނު ބަޔާނުގައި ބުނެފައިވަނީ ބިން ހިއްކުމަކީ ރައްޔިތުންގެ ވަރަށް ބޮޑު އުންމީދެއް ކަމަށެވެ. އަދި ރައްޔިތުން އެންމެ ބޮޑަށް ބޭނުންވެފައިވާ އެއް މަޝްރޫއެއް ކަމަށެވެ. އެ މަޝްރޫއު ނުހިންގަން ނިންމީ މަޝްވަރާ ވެސް ނުކޮށް ކަމަށް އިދިކޮޅު އެމްޑީޕީގެ މެޖޯރިޓީ އޮންނަ ދޮންފަނު ކައުންސިލުން ވަނީ ބުނެފަ އެވެ.

ދޮންފަނު ބިން ހިއްކަން ނިންމުމާއި ގުޅިގެން އެ ރަށާއި ކިލޯމީޓަރެއްހާ ކައިރީގައި އޮންނަ ހަނިފަރަށް ދޮންފަނު ހިއްކުމުން އަސަރުކުރާނެ ކަމަށް ބުނެ ވަރަށް ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެތަނަކީ ބައޮސްފެއާ ރިޒާވްއަކަށް ވާއިރު، އެތަނަކީ މުޅި ދުނިޔެއިން ވެސް ވަރަށް މަދުން ފެންނަ ފަދަ މަންޒަރުތައް ފެންނަ ސަރަހައްދެކެވެ. 539 ހެކްޓަރުގެ ބޮޑު ސަރަހައްދަކީ ފެހުރިއްސާއި އެންމަޑި ފަދަ ތަކެތި ކާނާ ހޯދުމަށް ޖަމާވާ ތަނެކެވެ.