ކުރީ ސަރުކާރޭ ކިޔަން ޖެހެނީ މި ސަރުކާރުގެ ވާހަކަ ދައްކާތީ: ވަޒީރު ސަޢީދު
މި ސަރުކާރުން އަބަދު "ކުރީ ސަރުކާރުގެ" ވާހަކަ ދައްކަނީ އެ ފަރާތްތަކުން ވެސް މި ސަރުކާރުގެ ވާހަކަތައް ދައްކާތީ ކަމަށް އިޤްތިސާދީ ތަރައްޤީއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު އެފަދައިން ވިދާޅުވީ ކާޑުގެ ބާވަތްތަކުގެ އިތުރުން، ރާއްޖޭގައި އެންމެ ގިނައިން ބޭނުންކުރާ 23 ބާވަތުގެ މޭވާ އާއި ތަރުކާރީގެ ބާވަތްތައް އެސްޓީއޯ އިން ގަނޑުކޮށް އެތެރެކޮށް، ބާޒާރުގައި ވިއްކަން ނިންމާފައިވާކަން ރައީސް އިއުލާންކުރެއްވުމާ ގުޅިގެން އެކަމުގެ މައުލޫމާތު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
މިދިޔަ ސަރުކާރުގެ ބައެއް އިޤްތިސާދީ ފިޔަވަޅުތަކުގެ ސަބަބުން ރާއްޖޭގެ ބްލެކް މާކެޓާއި ޑޮލަރުގެ އަގަށް އައި ބަދަލުތަކާއި މި ސަރުކާރުގެ ބައެއް އިޤްތިސާދީ ފިޔަވަޅުތަކުގެ ވާހަކަ ހިއްސާކުރައްވަމުން ވަޒީރު ވިދާޅުވީ، މި ސަރުކާރުގެ ކުރިން ޕްރޮފޯމާ އިންވޮއިސްތަކަށް ނުވަތަ ޓީޓީތަކަށް ބޭންކުތަކުން ޑޮލަރު ދޫކުރަނީ އެ އިންވޮއިސް ނުވަތަ ޓީޓީއެއްގެ ފަސް އިންސައްތަ އާއި 10 އިންސައްތައާއި ދެމެދުގެ އަދަދަކަށް ކަމަށެވެ.
އެހެން ނަމަވެސް މިހާރު ބޭންކުތަކުން 50 އިންސައްތައާ ހަމައަށް ރަސްމީ ރޭޓުގައި ޑޮލަރު ދޫކުރާ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވި ގޮތުގައި ރާއްޖޭގެ ބްލެކް މާކެޓަށާއި ޑޮލަރަށް އެހާ ބޮޑު އަސަރެއް ކުރީ، މިދިޔަ ސަރުކާރުގައި ޚަރަދަށް ޒިންމާވުމުގެ ޤާނޫނުގެ ތިން އަކުރެއްގައި "ތަޅު އަޅުވައި" 8 ބިލިއަން ރުފިޔާ ޗާޕުކުރުމުންނެވެ.
މީގެ ކުރިން ވެސް އޮތް ބްލެކް މާކެޓު. ބްލެކް މާކެޓު އުފެދިގެން އައި ގޮތާއި މި ކަންކަމުގެ ޑިބޭޓަށް ނުގޮސް އަޅުގަނޑު ދަންނަވާލާނަން ހަމަ މިދިޔަ 10 އަހަރުގެ ތެރޭގައި އަޅުގަނޑުމެން މަޖިލިސް މެންބަރުންގެ ގޮތުގައި ތިބެގެން އަޅުގަނޑުމެން ހާދަހާ ބޮޑަކަށް މިވާހަކަ ދެއްކީމޭ ތިހެން ނަހަދާށޭ، ޤާނޫނު ތަޅުލާފައި ފައިސާ ޗާޕު ނުކުރާށޭ ތިވަރަށް
އިޤްތިސާދީ ތަރައްޤީއާ ބެހޭ ވަޒީރު މުޙައްމަދު ސަޢީދު
ވަޒީރު ވިދާޅުވީ އެކަމުގެ ކަންވޮޑުވުން އޭރުގެ މަޖިލިސް މެންބަރުން ގޮތުގައި ތިއްބަވައިގެން، އޭރުގެ އެމްއެމްއޭގެ ގަވަރުނަރު އަލީ ޙާޝިމް އަށް ސިޓީގެ ޒަރިއްޔާއިން ކަންބޮޑުވުން ފާޅުކުރި ކަމަށެވެ. އެގޮތުން އެފަދައިން ފައިސާ ޗާޕުކުރާނަމަ ޑޮލަރުގެ އަގު 28 ރުފިޔާއިން 20 ރުފިޔާއަށް އަރައިގެން ދިޔުމުގެ ފުރުސަތު އޮތް ކަމަށް އޭރު ވެސް ވިދާޅުވި ކަމަށް ވަޒީރު ވިދާޅުވިއެވެ.
ޚަރަދަށް ޒިންމާވުމުގެ ޤާނޫނުގެ ތިން އަކުރެއް ތަޅުލާފައި 8 ބިލިއަން ރުފިޔާ ޗާޕުކުރީ، އަޅުގަނޑު ހުންނާނެ ސިޓީ ފޮނުވާފައި އެމްއެމްއޭގެ އޭރުގެ ގަވަރުނަރަށް އަޅުގަނޑުމެން އާދޭސްކުރިން ތިހެން ތިކަން ނުކުރާށޭ. ރައީސް އިބްރާހިމް މުޙައްމަދު ސޯލިޙުގެ ވެރިކަމުގައި 18 ރުފިޔާއިން 20 ރުފިޔާއަށް ޑޮލަރު އަރައިގެން ދިޔުމުގެ ފުރުސަތު އެބައޮތޭ އެހެންވީމާ ތިބޭފުޅުންގެ ނޫހުގައި ވެސް ހެޑްލައިން ހުންނާނެ އެ ވާހަކަ. އަޅުގަނޑުމެން ދައްކައިގެން. އަޅުގަނޑުމެން އާދޭސް ކުރިން އެކަން ނުކުރާށޭ.
އިޤްތިސާދީ ތަރައްޤީއާ ބެހޭ ވަޒީރު މުޙައްމަދު ސަޢީދު
އެއާއެކު ވަޒީރު ވިދާޅުވީ، މިއަދު އެ ފަރާތްތައް އިދިކޮޅުގައި ތިބެ، މި ސަރުކާރުން އަބަދު "ކުރީ ސަރުކާރޭ" ކިޔާތީ ކަންބޮޑުވި ނަމަވެސް، އެކަން މި ސަރުކާރުން ކުރަނީ އެ ފަރާތްތަކުން "މި ސަރުކާރޭ" ކިޔާތީއެވެ. އަދި އެއްވެސް ބަޔަކު "ސަރުކާރޭ" ނުކިޔާނަމަ، އެހެން ނުކިޔާނެ ކަމަށް ވެސް ވަޒީރު ވިދާޅުވިއެވެ.
އެބޭފުޅުން އެބަ ވިދާޅުވޭތާ އަބަދު ނުކިޔާށޭ ކުރީ ސަރުކާރޭ. އެހެންވީމާ އަޅުގަނޑުމެން މިހާރު ކުރީ ސަރުކާރޭ ނުކިޔަން. އެކަމަކު ކުރީ ސަރުކާރު ކިޔަން ޖެހެނީ މި ސަރުކާރޭ ކިޔާތީ. މި ސަރުކާރޭ ކިޔަންޏާ ކުރީ ސަރުކާރުގެ ވާހަކަ ކިޔަން ޖެހޭނެ ނޫންތޯ. އެހެންވީމާ އެއްވެސް ބަޔަކު ސަރުކާރޭ ނުކިޔަންޏާ އެއްވެސް ބަޔަކު ނުކިޔާނެ ސަރުކާރެއް.
އިޤްތިސާދީ ތަރައްޤީއާ ބެހޭ ވަޒީރު މުޙައްމަދު ސަޢީދު
ވަޒީރު ވިދާޅުވީ، ރައީސް މުޢިއްޒު ހުވާކުރެއްވި ރައްޔިތުންގެ ތަކިލީފުތަކަށް ޙައްލު ހޯއްދަވައިދެއްވަން ކަމަށެވެ. އެގޮތުން ސަރުކާރުން ރާއްޖޭގައި އެންމެ ގިނައިން ބޭނުންކުރާ 23 ބާވަތުގެ މޭވާ އާއި ތަރުކާރީގެ ބާވަތްތައް އެސްޓީއޯ އިން ގަނޑުކޮށް އެތެރެކޮށް ނިންމީ ވެސް، ރައްޔިތުންނަށް ހެޔޮ ފަސޭހަ ގޮތްތައް ހޯދައިދިނުމުގެ މަޤްސަދުގައި ކަމަށް ވެސް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
