ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަލް ޢަސްރު ޖަމިއްޔާއާ ގުޅިގެން ހުޅުމާލޭގައި ހިލޭ ޤުރުޢާން ކްލާސްތަކެއް ހިންގުމަށް ނިންމައިފިއެވެ.
އެޗްޑީސީން މިއަދު ވަނީ އަލް އަސްރު ޖަމިއްޔާއާ އެކު މިކަމުގެ އެއްބަސްވުމުގައި ސޮއިކޮށްފައެވެ. މިކަމަށްޓަކައި އެޗްޑީސީ އޮފީހުގައި ބޭއްވި ޚާއްސަ ރަސްމިއްޔާތެއްގައި، އެކުންފުނީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް (ރޓޑ) އަލީ ޒުހައިރުއެވެ. އަލް އަސްރު ޖަމިއްޔާގެ ފަރާތުން އެއްބަސްވުމުގައި ސޮއިކުރެއްވީ ނައިބު ރައީސް މުހައްމަދު ސަމޫހެވެ.
އެޗްޑީސީން ބުނީ މި އެއްބަސްވުމުގެ ދަށުން ހުޅުމާލޭގައި ޤުރުޢާން ކްލާސްތައް ހިންގުމުގެ އިތުރުން ދީނީ ދަރުސްތައް ދިނުމަށް ނިންމާފައިވާކަމަށެވެ. ޤުރުޢާން ކްލާސް ގެންދިއުމަށް ހަމަޖެހިފައިވަނީ ހަފްތާއަކު ފަސް ދުވަހު ކޮންމެ ދުވަހަކުވެސް 4 ސެޝަނެވެ.
މި ސެޝަންތަކުގައި ކްލާހެއްގައި 15 ކުދިންނަށް ބައިވެރިވެވޭނެއެވެ. ކްލާސްތައް ބާއްވާއިރު، ހަމަޖެހިފައިވާ އުސޫލުން ދަރުސް ދިނުންވެސް ކުރިއަށްގެންދިއުމަށް ހަމަޖެހިފައިވާކަމަށް އެޗްޑީސީން ވަނީ ބުނެފައެވެ.
މި ޕްރޮގްރާމްގެ ދަށުން ކުރިއަށްގެންދާ ކްލާސްތަކަށް ޓީޗަރުން ހަމަޖައްސާނީ އަސްރު ޖަމިއްޔާއިންނެވެ. އެޗްޑީސީން ބުނީ މިއީ ރައްޔިތުންގެ ހިތްތަކުގައި ދީނީ ލޯބި އުފައްދައި އިސްލާމީ އަޤީދާ ވަރުގަދަކުރުމުގެ މާތް މަޤްސަދުގައި އެކުންފުނީގެ އިޖުތިމާއީ ޒިންމާގެ ދަށުން ކުރިއަށްގެންދާ ޕްރޮގްރާމެއް ކަމަށެވެ.
Advertisement
This content is created and paid for by advertisers and does not involve Voice Journalists
