ރައްޔިތުންގެ ޚިޔާލު ހޯދުމުގެ އާންމު ވޯޓު، ވަކި ސަރަޙައްދުތަކެއްގެ ރައްޔިތުންގެ މެދުގައި އެކަނި ވެސް ނެގޭ ގޮތަށް މަޖިލީހަށް ހުށަހެޅި "ރައްޔިތުންގެ ހިޔާލު ހޯދުމުގެ އާންމު ވޯޓް ނެގުމުގެ ބިލު"، މަޖިލީހުން މިއަދު ފާސްކޮށްފިއެވެ.

ޕީއެންސީގެ ޕީޖީ ލީޑަރު އިބްރާހިމް ފަލާޙް މަޖިލީހަށް ހުށަހެޅުއްވި މި ބިލު މަޖިލީހުން ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 76 މެންބަރުންގެ ތެރެއިން 64 މެންބަރުންގެ ވޯޓުންނެވެ. މި ބިލާ ދެކޮޅަށް 12 މެންބަރަކު ވޯޓު ދެއްވާފައިވެއެވެ.

މި ބިލު މަޖިލީހުން ފާސްކުރިއިރު، އެ ބިލު ދިރާސާކުރި މަޖިލީހުގެ މިނިވަން މުއައްސަސާތަކުގެ ކޮމިޓީން ވަނީ މައިގަނޑު ހަތް އިސްލާހެއް ހުށަހަޅާފައެވެ. 

އެގޮތުން އާންމު ހިޔާލު ހޯދުމުގެ ވޯޓު ނެގުމަށް މަޖިލީހަށް ލާޒިމުވާ ހާލަތު އިހުތިޔާރީ ކަމެއްގެ ގޮތުގައި އޮތް އޮތުން، އާންމު ހިޔާލު ހޯދުމުގެ ވޯޓެއް ނެގުމަށް ރައްޔިތުންގެ މަޖިލީހަށް ފެނިއްޖެ ހާލަތެއްގައި ވެސް، މި ގާނޫނާ ފުށޫނާރާނެ ގޮތަކަށް މަޖިލީހުގެ ގަވާއިދުގެ ދަށުން އެފަދަ ވޯޓެއް ނެގިދާނެ ކަމަށް ވަނީ ބަދަލުކޮށްފައެވެ. 

އަދި ހިޔާލު ހޯދުމުގެ ވޯޓެއް ނަގަން މަޖިލީހަށް ފެނިއްޖެ ނަމަ އަދި ލާޒިމުވާ ހާލަތުގައި ވެސް އެފަދަ ވޯޓެއް ނަގަން ކަނޑައަޅާނީ އެ ދުވަހެއްގެ މަޖިލީހުގެ ޖަލްސާގައި ނަގޭ ވޯޓުގައި ބައިވެރިވެވަޑައިގަންނަވާ މެންބަރުންގެ އަގުލަބިއްޔަތުން ކަމަށް އޮތް އޮތުން، ހިޔާލު ހޯދުމުގެ ވޯޓު ނަގަން މަޖިލީހަށް ލާޒިމުވާ ހާލަތުގައި އެކަން ކަނޑައަޅާނީ މަޖިލީހުގެ ޖަލްސާއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގަންނަވާ މެންބަރުންގެ އަގުލަބިއްޔަތުން ފާސްކުރާ ގަރާރަކުން ކަމަށް ވެސް ވަނީ ބަދަލުކޮށްފައެވެ. 

އަދި ހިޔާލު ހޯދުމުގެ ވޯޓު ނަގަން މަޖިލީހަށް ފެނިއްޖެ ނަމަ އެ ވޯޓެއް ނަގަން ކަނޑައަޅާނީ މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްކުރާ ގަރާރަކުން ކަމަށް ވެސް އެ ބިލުގައި ހިމަނާފައިވެއެވެ.

އެ ބިލަށް ގެނައި އިތުރު އިސްލާހުތަކުގައިވާ ގޮތުން، ހިޔާލު ހޯދުމުގެ ވޯޓުގެ އަގުލަބިއްޔަތު ބަލާނީ އިންތިހާބުގައި ވޯޓްދިން މީހުންގެ ތެރެއިން ސައްހަ ވޯޓުގެ %50އަށް ވުރެ ގިނަ ވޯޓް ނިންމުމަށް ލިބުމުންނެނެވެ. 

އަދި ވޯޓް ނެގުމުގެ 21 ދުވަހުގެ ކުރިން އެ ވޯޓާ ގުޅޭ މައުލޫމާތު ކަރުދާސް އާންމުކޮށް އާންމުން ހޭލުންތެރިކުރުުވަން ކައުންސިލަށް ލާޒިމުކުރާއިރު، ވޯޓް ނަގަން އިލެކްޝަންސް ކޮމިޝަނަށް ހުށަހަޅާތާ މަދުވެގެން 45 ދުވަސް އަދި ގިނަވެގެން 90 ދުވަހުގެ ތެރޭގައި އެ ވޯޓް ނަގަން ޖެހެއެވެ.

ވަކި ސަރަހައްދަކަށް ނަގާ ވޯޓްގައި 45 ދުވަހަށް ވުރެ ކުރު މުއްދަތެއްގެ ތެރޭގައި ވެސް އެފަދަ ވޯޓެއް ނެގިދާނެކަމަށް ވެސް ހިމަނާފައިވާއިރު، އިލެކްޝަންސް ކޮމިޝަނުން ބަޖެޓަށް އެދޭތާ 10 ދުވަހުގެ ތެރޭގައި ވޯޓަށް ބޭނުންވާ ފައިސާ ހަމަޖައްސައިދިނުން ވެސް ވަނީ ލާޒިމްކޮށްފައެވެ.

މި ބިލަށް ޢަމަލުކުރަން ފަށާނީ ރައީސް މި ބިލު ތަސްދީޤުކުރައްވައި، ސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެންނެވެ.