އިދިކޮޅު ފަރާތްތަކުގެ އަޑުވެސް އިއްވެންވާނެ: އެމެރިކާ
ހިޔާލްފާޅުކުރުމުގެ މިނިވަންކަން ދެމެހެއްޓުމުގައި އިދިކޮޅު ފަރާތްތަކުގެ އަޑުވެސް އިއްވެންވާނެކަމަށް ރާއްޖޭގައި ހުންނަ އެމެރިކާގެ އެމްބަސީން ބުނެފިއެވެ.
ރައްޔިތުންގެ މަޖިލީހުން މިއަދު މީޑިއާ ރެގިއުލޭޓްކުރާ ބިލް ފާސްކުރުމާ ގުޅިގެން އެކްސްގައި ކުރި ޕޯސްޓެއްގައި އެމެރިކާ އެމްބަސީން ބުނެފައިވަނީ، މިނިވަން ނޫސްވެރިކަމާއި ހިޔާލްފާޅުކުރުމުގެ މިނިވަންކަން ދެމެހެއްޓުމުގައި އިދިކޮޅު ފަރާތްތަކުގެ އަޑުވެސް އިއްވެން ވާނެކަމަށެވެ. އެމްބަސީން ބުނީ، އެމެރިކާއިން ރާއްޖެ ހިމެނޭހެން ހުރިހާ ޤައުމުތަކަކަށްވެސް ގޮވާލަނީ އެބީދައިން ހިޔާލްފާޅުކުރުމުގެ މިނިވަންކަން ދެމެހެއްޓުމަށްކަމަށެވެ.
ހިޔާލްފާޅުކުރުމުގެ މިނިވަންކަމަކީ އަސާސީ ހައްޤެއްގެ ގޮތުގައު ފާހަގަކުރަމުން އެމެރިކާ އެމްބަސީން ބުނެފައިވަނީ، މިނިވަން ނޫސްވެރިކަމާ ހިޔާލް ފާޅުކުރުމުގެ މިނިވަންކަމަށް ކުރެވޭ މަސައްކަތްތަކުގައި އެޤައުމުން އަބަދުވެސް އެއްބާރުލުން ދޭނޭކަމަށެވެ.
އެމެރިކާ އެމްބަސީން އިދިކޮޅު ފަރާތްތަކުގެ އަޑު އިއްވުމުގެ މުހިއްމުކަމަށް ގޮވާލާފައިވާއިރު، މަޖިލީހުން މިއަދު ފާސްކުރި ބިލާއެކު ސަރުކާރާ އިދިކޮޅު ފަރާތްތަކުގެ އަޑު ކެނޑިގެންދާނޭކަމަށް ބައެއް ނޫސްވެރިންނާއި އިދިކޮޅު ސިޔާސީ ފަރާތްތަކުން ވަނީ ބުނެފައެވެ.
ނަމަވެސް ސަރުކާރުން ބުނެފައިވަނީ މިއަދު ފާސްކުރި ބިލަކީ މިނިވަން ނޫސްވެރިކަމަށް އޮތް ހުރަހެއް ނޫންކަމަށާއި، ހިޔާލްފާޅުކުރުމުގެ މިނިވަންކަން ހުއްޓުވުމަކީ ސަރުކާރުގެ ސިޔާސަތެއް ނޫންކަމަށެވެ.
Advertisement
This content is created and paid for by advertisers and does not involve Voice Journalists
