އިއްޔެ ރައްޔިތުންގެ މަޖިލީހުން ފާސްކުރި މޯލްޑިވްސް މީޑިޔާ އެންޑް ރެގިއުލޭޝަން ބިލު ބާތިލް ކުރަން ސުޕްރީމު ކޯޓަށް ދިޔުމާމެދު ގޮތެއް ނިންމަމުން ދާކަމަށް އެމްޑީޕީން ބުނެފިއެވެ.

އެމްޑީޕީން އެފަދައިން ބުނީ، އިއްޔެ މަޖިލީހުގެ ބޭރުގައި ހިނގި ޙާދިސާތަކުގައި އެމްޑީޕީގެ ޤައުމީ މަޖިލީހުގެ މެންބަރުންނަށާއި ނޫސްވެރިންނަށް ފުލުހުން އަނިޔާކުރި ކަމަށް ބުނެ، ނޭޝަނަލް އިންޓެގްރިޓީ ކޮމިޝަން (އެންއައިސީ)އަށް މައްސަލަ ހުށަހެޅުމަށް ފަހު މިއަދު ނޫސްވެރިންނަށް މައުލޫމާތު ހިއްސާކުރަމުންނެވެ.

ތޮއްޑޫ ދާއިރާގެ މެންބަރު ހުސައިން ސަމީރު މުޙައްމަދު ވިދާޅުވީ، އިއްޔެ މަޖިލީހުން ފާސްކުރީ ބާތިލު ބިލެއް ކަމަށާއި، އެ ބިލަކީ ޤާނޫނު އާސާސީ އާއި ހެދިފައިހުރި ޤަވާއިދުތަކާ ޚިލާފަށް ފާސްކުރި ބިލެއް ކަމަށެވެ.

އަދި އިއްޔެގެ މަޖިލީހުގެ ޖަލްސާ ވެސް ހިންގާފައިވަނީ މަޖިލީހުގެ ޤަވާއިދާ ޚިލާފަށް ކަމަށް މެންބަރު ވިދާޅުވިއެވެ. އެހެންކަމުން މަޖިލީހުގެ ކޮމެޓީ އާއި މަޖިލީހުގެ ތަޅުމުން ޤާނޫނު އަސާސީ އާއި ޤަވާއިދުތަކާއި ޚިލާފަށް ފާސްކޮށްފައިވާ ބިލަކަށް ވާތީ، އެ ބިލު ބާތިލްކުރުމަށް ސުޕްރީމު ކޯޓަށް ހުށަހެޅުމަށް އެ ޕާޓީގެ ޕީޖީ ގްރޫޕުން މަސައްކަތްކުރަމުން އަންނަ ކަމަށް ސަމީރު ވިދާޅުވިއެވެ.

އެ މައްސަލަ ކޯޓަށް ހުށަހަޅަނީ މުޅި ބިލް ބާތިލްކުރައްވަންތޯ "ވޮއިސް" އިން ސުވާލުކުރުމުން މެންބަރު ވިދާޅުވީ، މިހާރު ކުރަމުންދަނީ އެ މުޅި ބިލް ބާތިލްކުރުމާ ގުޅޭ ގޮތުން ގޮތެއް ނިންމުމުގެ މަސައްކަތް ކަމަށެވެ. އެހެންކަމުން މިހާތަނަށް އެ ބިލުގެ ވަކި މާއްދާތަކެއް ނުވަތަ މުޅި ބިލް ބާތިލްކުރުމާ މެދު ގޮތެއް ނިމިފައިނުވާ ކަމަށް މެންބަރު ވިދާޅުވިއެވެ.

އަދި ސުޕްރީމު ކޯޓަށް ހުށަހެޅޭ ދުސްތޫރީ މައްސަލަތައް ބެލޭނީ އެ ކޯޓުގެ މުޅި ބެންޗު ފުރިހަމަ ވުމުންކަން "ވޮއިސް"އިން ފާހަގަކޮށް ސުވާލުކުރުމުން، މެންބަރު ވިދާޅުވީ ސުޕްރީމު ކޯޗުގެ ބެންޗު ފުރިހަމަވުމާއި ގުޅެނީ އެ މައްސަލަ ބެލުމާ ކަމަށާއި، އެކަން އެ މައްސަލަ ހުށަހެޅުމާއި ނުގުޅޭ ކަމަށެވެ. 

އެހެންކަމުން އެމްޑީޕީގެ ފަރާތުން އެ މައްސަލަ ހުށަހަޅާނެ ކަމަށާއި، އެމްޑީޕީގެ އުންމީދަކީ އެ މައްސަލައިގައި ޝަރުޢީ ފަރުވާ ލިބުން ކަމަށް ވެސް މެންބަރު ވިދާޅުވިއެވެ.

މެންބަރު އެފަދައިން ވިދާޅުވިއިރު، މިހާތަނަށް ވެސް ސުޕްރީމު ކޯޓުގެ ފަނޑިޔާރުކަމުން ވަކިކުރެއްވި އަޒްމިރަލްދާ ޒާހިރު އަދި މަހާޒް އަލީ ރަޝީދުގެ ބަދަލުގައި އެހެން ބޭފުޅަކު އައްޔަނުކުރައްވައިފައެއް ނުވެއެވެ. ހުސްނުއް ސުޢޫދުގެ ބަދަލުގައި އެ ކޯޓަށް ހައި ކޯޓުގެ ކުރީގެ އިސް ފަނޑިޔާރު ހުސައިން ޝަހީދު އައްޔަނުކުރައްވާފައިވީ ނަމަވެސް، ދުސްތޫރީ މައްސަލައެއް ބެލޭނެ ފަދަ ޙާލަތެއް އަދިވެސް އެ ކޯޓަކު ނެތްކަން ފާހަގަކުރެވެއެވެ.

އެ ކޯޓުގެ ފަނޑިޔާރުކަމުން އަޒްމިރަލްދާ އަދި މަހާޒް ވަކިކުރައްވައި، އެ ކޯޓުގެ ފަނޑިޔާރުކަމުން ހުސްނުއް ސުޢޫދު އިސްތިއުފާދެއްވިއިރު ވެސް އެ ކޯޓަށް ވަނީ ދުސްތޫރީ މައްސަލައެއް ހުށަހަޅާފައެވެ. އެގޮތުން އޭރު އެ ކޯޓަށް ވަނީ ސިޔާސީ ޕާޓީތަކުން ވަކިވާ ނުވަތަ ވަކިކުރާ މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް މަޖިލީހުން ގެނެސްފައިވާ އިސްލާހު ބާތިލް ކުރުމުގެ މައްސަލަ އެ ކޯޓަށް ހުށަހަޅާފައެވެ. 

އެ ތިން ފަނޑިޔާރުން ސަސްޕެންޑްކުރުމާއި ގުޅިގެން މިހާތަނަށް ވެސް އެ މައްސަލައިގައި ގޮތެއް ނިންމާފައެއް އެ ކޯޓުން ނުވެއެވެ.