ހަމަތަކާއި، އުސޫލުތަކުގެ ތެރެއިން ބޭނުން ވާހަކައެއް ދެއްކޭނެ ކަމަށާ ތެދު ހަގީގަތަަށް ކޮންމެ އެއްޗެއް ވެސް ލިޔޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
"ރައްޔިތުންނާ އެކު" ސިލްސިލާ ޕޮޑްކާސްޓްގެ 9 ވަނަ އެޕިސޯޑްގައި ވާހަކަފުޅު ދައްކަވަމުން ރައީސް މި މޭރުމުން ވާހަކަ ދެއްކެވީ ވަރަށް ގިނަ ނޫސްވެރީންނާއި އިދިކޮޅު ސިޔާސީ ޕާޓީތަކުން އަދި އާންމުންގެ ބަޔަކު ދެކޮޅު ހަދަމުން ދަނިކޮށް މީޑިއާ ބިލް ފާސްކުރުމާއި ގުޅިގެންނެވެ.
ރައީސް ވިދާޅުވީ ދިވެހީންނަކީ މުސްލިމުން ކަމުން ހިތަށް އަންނަހާ ކޮންމެ އެއްޗެއް އެއްވެސް ބެލުމެއްނެތި ލިޔުމަކީ ކުރެވޭނެ ކަމެއް ނޫން ކަމަށެވެ. އަދި އެއީ އިންސާނަކަށްވީތީ ވެސް ކުރެވޭނެ ކަމެއް ނޫން ކަމަށް ވިދާޅުވި އެވެ.
"އިސްލާމްދީނުގައި މި އޮންނަނީ އަބުރު ރައްކާތެރިކުރާށޭ. އިސްލާމް ދީން ފޮނުއްވި މައިގަނޑު ފަސްކަމެއްގެ ތެރެއިން އެއްކަމަކީ، އަބުރު ރައްކާތެރިކުރުން. އެހެންވީމާ، ކޮންމެ މީހަކީވެސް ކަރާމާތެއް ލިބިގެންވާ، ޢިއްޒަތެއް ލިބިގެންވާ، އަބުރެއް ލިބިގެންވާ ފަރާތެއްކަން އަޅުގަނޑެއް ނޫން ކަނޑައެޅީކީ. ޝަކީބެއްނޫން ކަނޑައެޅީކީ. މަތިން اللهُ سُبْحَانَهُ وَتَعَالَى އެކަން ކަނޑައެޅުއްވީ. އެހެންވީމާ، އެ އަބުރު ރައްކާތެރި ކުރުމަކީ އެއީ ކޮންމެ މީހެއްގެ ވެސް ހައްގެއް. އަދި އަނެކާގެ ޒިންމާއެއް," ރައީސް ވިދާޅުވި އެވެ.
އަދި އެއީ އިސްލާމީ މިފަދަ ގައުމެއްގައި ބަހުސްކުރަން ވެސް ޖެހޭ ކަމެއް ނޫން ކަމުގައި ވިދާޅުވި އެވެ.
ރައީސް ވިދާޅުވީ ހަމަތަކާއި، އުސޫލުތަކުގެ ތެރެއިން ބޭނުން ވާހަކައެއް ދެއްކެން އޮންނާނެ ކަމަށެވެ. އަދި ބޭނުން ވާހަކައެއް ދައްކަންވީ ކަަމުގައި ވިދާޅުވި އެވެ.
"...ތެދު ހަގީގަތާ އެއްގޮތަށް ހަމަ ކޮންމެ ވާހަކައެއްވެސް ދެއްކޭނެ. ކޮންމެ އެއްޗެއްވެސް ލިޔެވޭނެ. ކޮންމެ ކަހަލަ ކޮންޓެންޓެއްވެސް ކުރިއޭޓް ކުރެވޭނެ. ތެދު ހަގީގަތާ އެއްގޮތަށް. އެހެންވީމާ، އެކަން ކުރާށޭ. އޭގެ ބަދަލުގައި، އެއްވެސް ބެލުމެއްނެތި، ތެދު ހަގީގަތެއް ނެތް ދޮގުވާހަކަތައް ފެތުރުން އެއީކީ އަޅުގަނޑު ހިތުން ހަމަ ޔަގީނުންވެސް މި ރާއްޖޭގެ ރައްޔިތުން ބޭނުންވާ ކަމެއް ނޫން," ރޭ ފާސްކުރި ބިލް ދިފާއު ކުރައްވާ ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
