ގެދޮރުވެރިޔާ އަދި ބިންވެރިޔާ ސްކީމުގެ މައްސަލައިގައި އަކްރަމް ކަމާލުއްދީންގެ މައްޗަށް ދަޢުވާކޮށްފި
މިދިޔަ ސަރުކާރުން ހިންގި ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލަތަކުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީނާއި އިތުރު ތިން މީހެއްގެ މައްޗަށް ދައުވާކުރަން ޕީޖީ އޮފީހުން ނިންމައިފިއެވެ.
ޕީޖީ އޮފީހުން ބުނި ގޮތުގައި ދައުވާކުރަނީ އަކްރަމްގެ އިތުރުން، ހައުސިން މިނިސްޓްރީގެ ކުރީގެ ސީނިއަރ އެގްޒެކެޓިވް ޑިރެކްޓަރ އަދި ގެދޮރުވެރިން ކޮމިޓީގެ މެންބަރު މުޙައްމަދު ޢާރިފް، ޑިރެކްޓަރ ޖެނެރަލް އަޙްމަދު ވިޝާން ނަސީމް، އަދި ސީނިއަރ އެގްޒެކެޓިވް ޑިރެކްޓަރު ޟިރުޣާމް ވަޙީދުއަށެވެ. އެމީހުންގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާއެވެ. މިއީ ޤާނޫނުލްޢުޤޫބާތުގެ 513 ވަނަ މާއްދާގެ ދަށުން ކުރެވޭ ދަޢުވާއެކެވެ.
މި މައްސަލައިގައި އެމީހުންގެ މައްޗަށް ތުހުތަމުކުރެވެނީ 2022ވަނަ އަހަރުގެ ޖޫން މަހު އިޢުލާނުކުރި ބިންވެރިޔާ އަދި ގެދޮރުވެރިޔާ ސްކީމްގެ ދަށުން، ގޯއްޗާއި ފްލެޓަށް އެދި ހުށަހެޅި ބައެއް ފަރާތްތަކަށް އުސޫލާ ޚިލާފަށް ޕޮއިންޓް ދީ، ޝަރުތު ފުރިހަމަނުވާ ފަރާތްތަކެއް ލިސްޓުގައި ހިމަނާފައިވާ މައްސަލައެވެ.
އެ މައްސަލައާ ގުޅުންހުރި އިތުރު ބައިތައް އެންޓި-ކޮރަޕްޝަން ކޮމިޝަނާއި ދިވެހި ފުލުހުންގެ ޚިދުމަތުން ދަނީ ތަޙުޤީޤު ކުރަމުންދާ ކަމަށް ޕީޖީ އޮފީހުން މައުލޫމާތުދީފައިވެއެވެ. އަދި އެ މައްސަލަތައް ނިމޭވަރަކުން އިތުރު ދައުވާތައް ކުރުމާ މެދު ގޮތެއް ނިންމާނެކަން އެ އޮފީހުން ވަނީ މައުލޫމާތުދީފައެވެ.
Advertisement
This content is created and paid for by advertisers and does not involve Voice Journalists
