އެމްޑީޕީ ވެރިކަމެއްގައި ރައްޔިތުން ބޭނުންވާނަމަ ވޭޕް އެތެރެކުރެވޭނެގޮތް ހަދާނޭކަމަށް އެމްޑީޕީގެ ޗެއާޕާސަން ފައްޔާޒް އިސްމަޢީލް ވިދާޅުވެއްޖެއެވެ.

ރޭ ބޭއްވި އެމްޑީޕީގެ ޤައުމީ މަޖިލީހުގައި ފައްޔާޒް ވިދާޅުވީ ރައީސް މުއިއްޒު ރައްޔިތުންނަށް ތުރާވާގޮތަށް ކޮށްފައި ހުންނަ ކަންކަން ރަނގަޅުކުރާނޭކަމަށެވެ. އެގޮތުން ޤާނޫނު އަސާސީ އިރާލައިގެން ކޮށްފައި ހުރި ކަންކަން އެމްޑީޕީގެ ވެރިކަމުގައި އަލުން އިއާދަކުރާއިރު، އެފަދަ ކަންކަން މިހާރަށްވުރެ ފުރިހަމައަށް ރަނގަޅު ކުރާނޭކަމަށް ފައްޔާޒު ވިދާޅުވިއެވެ.

ފައްޔާޒް ވިދާޅުވީ އެމްޑީޕީގެ ވެރިކަމެއްގައި ރައްޔިތުން ބޭނުންވާނަމަ، ބޮޑުކޮށްފައިވާ ސިނގިރޭޓްގެ ޑިއުޓީ އާއި، ވޭޕް އެތެރެކުރުން މަނާކޮށްފައި އޮތް އޮތުން ނިމުމަކަށް ގެންނަވާނޭކަމަށެވެ.

ޤާނޫނު ނަންބަރު 2010/15 (ދުންފަތް ކޮންޓްރޯލުކުރުމާބެހޭ ޤާނޫނު) ގެ ދަށުން މިހާރު ރާއްޖެއަށް ވޭޕް އެތެރެކުރުމަކީ މަނާކަމެކެވެ. ދުންފަތްކޮޓްރޯލްކުރާ އެބިލް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަސްދީގު ކުރައްވާފައިވަނީ މިދިޔަ އަހަރުގެ ނޮވެމްބަރުމަހުގެ 14 ވަނަ ދުވަހެވެ. އެ ބިލުގައި އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އެފަދަ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، އެ ތަކެތި ބޭނުންކުރުން މަނާކޮށްފައިވެއެވެ.

ވޭޕް ކުރުމާއި ގެންގުޅުމުގެ ކުށުގައި މިދިޔަ މަހު އެކަނިވެސް 150،000 ރުފިޔާގެ ޖޫރިމަނާ ކޮށްފައިވާ ކަމަށް މޯލްޑިވްސް ޕޮލިސް ސާވިސް އިން ބުނެއެވެ.