އައްޑޫސިޓީ އެކުއެޓޯރިއަލް ހޮސްޕިޓަލަށް 10 ޑަޔަލިސިސް މެޝިން ގެނެސްދޭނެ ފަރާތެއް ހޯދުމަށް މިނިސްޓްރީ އޮފް ފިނޭންސް އެންޑް ޕްލޭނިން އިން އިއުލާނުކޮށްފިއެވެ.

ފިނޭންސުން ކުރި އިއުލާނުގައި ބުނެފައިވަނީ، އައްޑޫ އެކުއެޓޯރިއަލް ހޮސްޕިޓަލްގެ އެދުމުގެ މަތިން، އެ ހޮސްޕިޓަލަށް ބޭނުންވާ 10 ޑަޔަލިސިސް މެޝިން ސަޕްލައިކޮށް، އިންސްޓޯލްކޮށް އަދި ލީސްކޮށްދޭނެ ފަރާތެއް ބޭނުންވާކަމަށެވެ. މި މަސައްކަތް ބީލަމުގެ އުސޫލުން ކުރިއަށްގެންދިއުމަށް ނިންމާފައިވަނީ ދެ ލޮޓަކަށް ބަހާލައިގެންނެވެ. އެގޮތުން ކޮންމެ ލޮޓަކަށް ކަނޑައަޅާފައިވަނީ 5 ޑަޔަލިސިސް މެޝިނެވެ. މި މަސައްކަތް ކޮށްދިނުމަށް އެދޭ ފަރާތްތަކުން ބިޑް ހުށަހަޅަންޖެހެނީ 29 ސެޕްޓެމްބަރުގެ ކުރިންނެވެ.

އައްޑޫސިޓީ އަކީ ރާއްޖޭގެ އެންމެ އާބާދީބޮޑު އެއް ސަރަހައްދެވެ. އައްޑޫސިޓީގައިވެސް ކިޑްނީ ބަލީގެ މީހުން މިހާރު ނިސްބަތުން ގިނަވަމުން އަންނަކަމަށް ކަމާބެހޭ އިދާރާތަކުން ފާހަގަކުރެއެވެ.

މަނަދޫ ހޮސްޕިޓަލުގައި ހުންނަ ޑަޔަލިސިސް ޔުނިޓެއް... ފޮޓޯ: މަނަދޫ ހޮސްޕިޓަލް

ރާއްޖޭގައި އެންމެ ފުރަތަމަ ޑަޔަލިސިސް ޔުނިޓެއް ގާއިމްކޮށްފައިވަނީ، 2001 ވަނަ އަހަރު އައިޖީއެމްއެޗްގައެވެ. އަދުގެ ސަރުކާރުން ވަނީ ރާއްޖޭގެ އެކި ސަރަހައްދުތަކުގައި ޑަޔަލިސިސް ޔުނިޓްތައް ގާއިމްކުރުމަށް މަސައްކަތްކުރަމުންނެވެ. އެގޮތުން މިހާރު ރާއްޖޭގެ 8 އަތޮޅެއްގައި 13 ޑަޔަލިސިސް ޔުނިޓް ގާއިމްކޮށްފައިވާނޭކަމަށް ސަރުކާރުން ބުނެއެވެ. 

ގައިގަޔަށް ނާރާ ބަލިތަކުގެ ތެރެއިން ރާއްޖޭގައި އެންމެބޮޑު ހޭދައެއްކުަރަންޖެހެނީ ކިޑްނީ ބަލިތަކަށެވެ. މިގޮތުން ރާއްޖެއިން ބޭރަށް ބޭސްފަރުވާއަށް ދާ ފަރާތްތަކުގެ ތެރެއިން ކިޑްނީ ބަލިތަކަށް ފަރުވާ ހޯދަން ދާ މީހުނަށް ނިސްބަތުން ބޮޑު ހަރަދެއް ކުރަންޖެހޭކަމަށް ސަރުކާރުން ފާހަގަކުރެއވެެ.