އޭނާ އާއި އޭނާގެ ސަރުކާރާއި ދެކޮޅަށް ރިޕޯޓުކުރާ މީޑިއާތަކުގެ ޢަމަލުތަކަކީ، ޤާނޫނާ ޚިލާފު ކަމެއް ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
އިއްޔެ އޯވަލް އޮފީހުގައި ދެއްކެވި ވާހަކަފުޅުގައި ޓްރަމްޕް ވަނީ ސީއެންއެން އަދި އެމްއެސްއެންބީސީ ފަދަ ބޮޑެތި ނެޓްވޯކްތަކަކީ ޑިމޮކްރެޓިކް ޕާޓީގެ ސިޔާސީ ބާޒުތަކެއްގެ ގޮތުގައި މަސައްކަތްކުރާ ފަރާތްތަކެއް ކަމަށް ތުހުމަތުކުރައްވާފައެވެ.
ޓްރަމްޕް ވިދާޅުވި ގޮތުގައި އެ މީޑިއާތަކުން އޭނާއާ ދެކޮޅަށް ގެނެސްދޭ ކަވަރޭޖްގެ 97 އިންސައްތަ އަކީ ނެގަޓިވް ކަވަރޭޖްއެވެ. އަދި މިއީ ކޮރަޕްޓް ޢަމަލުތަކެއް ކަމަށާއި, އެކަންކަމަކީ "ޣައިރު ޤާނޫނީ" ކަމެއް ކަމަށް ތަކުރާރުކޮށް އޭނާ ވަނީ ވިދާޅުވެފައެވެ.
"މިކަން ހުއްޓުވަންޖެހޭ. މިއީ ޣައިރު ޤާނޫނީ ކަމެއް،" ޓްރަމްޕް ވިދާޅުވެފައިވެއެވެ.
ޓްރަމްޕް މިހެން ވިދާޅުވެފައިވަނީ އެކްޓިވިސްޓް ޗާލީ ކާކް މަރާލި ހާދިސާއާ ގުޅުވައި ކޮމީޑިއަން ޖިމީ ކިމެލް އޭބީސީ ޓީވީގެ ޝޯގައި ދެއްކި ވާހަކައަކާ ގުޅިގެން އޭނާ ސަސްޕެންޑްކުރި ދަނޑިވަޅުގައެވެ.
އެގޮތުން ޓްރަމްޕްގެ މި ވާހަކަފުޅުތަކާއި ގުޅިގެން ނޫސްވެރިންނާއި، އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކާއި، ޤާނޫނީ މާހިރުންގެ މެދުގައި ކަންބޮޑުވުން ވަނީ އުފެދިފައެވެ. އެމެރިކާގެ ޤާނޫނު އަސާސީގައި ނޫސްވެރިކަމުގެ މިނިވަންކަން ރައްކާތެރިކުރާއިރު، އެކަމަކީ ޑިމޮކްރަސީއެއްގައި މީޑިއާގެ އެންމެ މުހިންމު އެއް ދައުރު ކަމަށް ފާޑުކިޔާ ފަރާތްތަކުން ދަނީ ބުނެ ކަންބޮޑުވުން ފާޅުކުރަމުންނެވެ.
އަދި ސަރުކާރަށާއި ސަރުކާރުގެ ސިޔާސަތުތަކަށް ފާޑުކިޔާ ކަވަރޭޖަކީ ޣައިރު ޤާނޫނީ ކަމެއްކަން ދައްކުވައިދޭ އެއްވެސް ޤާނޫނެއް ޓްރަމްޕް ހުށަހަޅުއްވާފައި ނުވާކަން މީޑިއާގެ މާހިރުން ވަނީ ފާހަގަކޮށްފައެވެ.
ޓްރަމްޕުގެ އެ ވާހަކަފުޅުތަކާ ގުޅިގެން އެމެރިކާގައި ވެސް ވަނީ ޤައުމީ ބަހުސެއް ފެށިފައެވެ. އެގޮތުން ގިނަ ބަޔަކު ދެކޭގޮތުގައި މިއީ މިނިވަން މީޑިއާގެ އަގުވައްޓާލުމަށާއި ފާޑުކިޔާ ފަރާތްތައް ހަނުކުރުމަށް ސަރުކާރުން ކުރާ މަސައްކަތެކެވެ.
އެގޮތުން މަދަނީ ޖަމްޢިއްޔާތަކާއި ނޫސްވެރިކަމުގެ މިނިވަންކަމަށް މަސައްކަތްކުރާ ފަރާތްތަކުން ވަނީ ސަރުކާރަށް ފާޑުކިޔާ ފަދައިން ރިޕޯޓުކުރުމަކީ ޣައިރު ޤާނޫނީ ކަމެއް ކަމަށް ބުނުމުން މީޑިއާއަށް އޮންނަ އާންމުންގެ އިތުބާރު ގެއްލި، ޚިޔާލުފާޅުކުރުމުގެ މިނިވަންކަމަށް ހުރަސްތަކެއް ކުރިމަތިވެދާނެ ކަމަށް ވެސް ބުނެފައެވެ.
Advertisement
This content is created and paid for by advertisers and does not involve Voice Journalists
