މ. ދިއްގަރުގެ ގޮނޑުދޮށް ހިމާޔަތްކުރުމުގެ މަޝްރޫޢު ރަސްމީކޮށް ނިންމާލައިފިއެވެ.
ރައީސް ޑރ. މުޙައްމަދު މުޢިއްޒު ދިއްގަރަށް މިއަދު ކުރެއްވި ދަތުރުފުޅުގައި ބޭއްވި ޚާއްސަ ރަސްމިއްޔާތުގައި، މިނިސްޓާ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބު ވަނީ މަޝްރޫޢުގެ ލިޔެކިޔުންތައް ދިއްގަރު ކައުންސިލްގެ ރައީސް އަޙްމަދު ނިޝާންއާ ހަވާލުކުރައްވާފައެވެ.
ދިއްގަރުގެ ގޮނޑުދޮށް ހިމާޔަތްކުރުމާއި ބަނދަރު ހެދުމުގެ މަޝްރޫޢު އެމްޓީސީސީއާ ހަވާލުކުރެވުނީ 2020 ވަނަ އަހަރުގެ ނޮވެމްބަރު މަހުގައެވެ. މި މަޝްރޫޢުގެ ދަށުން 25 ހެކްޓަރުގެ ބިން ހިއްކުމާއި، ގޮނޑުދޮށް ހިމާޔަތްކުރުމުގެ މަސައްކަތްތަކާއި، ބޭރުތޮށި ލުމާއި، ބަނދަރު ހެދުން ހިމެނެއެވެ. މި މަޝްރޫޢުގެ އަގަކީ 121 މިލިއަން ރުފިޔާއެވެ.
މި މަޝްރޫޢު ނިމުމާއެކު، ދިއްގަރަށް ދިމާވެފައިވާ އެންމެ ބޮޑު އެއް މައްސަލައަށް ހައްލު ލިބި، ބިން ހިއްކުމާއި ބަނދަރު ތަރައްޤީވުމާ ގުޅިގެން ތަރައްޤީއާއި އިޤްތިޞާދީ ކުރިއެރުމަށް އިތުރު ފުރުޞަތުތަކެއް ހުޅުވޭނެ ކަމަށް ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
