ޅ.ހިންނަވަރު ގެއަކުން ރިހާކުރު ޓައްޕުތަކެއް ވަގަށްނެގި މީހަކު ޖަލަށްލުމަށް ވާދޫ މެޖިސްޓްރޭޓް ކޯޓުން ހުކުމްކޮށްފިއެވެ.

ވާދޫ މެޖިސްޓްރޭޓް ކޯޓުން އެ ހުކުމްކޮށްފައިވަނީ، ނައިފަރު ގެއަކަށް ދެ ރެއެއްގެ މަތިން ވާދޫ މީހަކު ގޮސް ރިހާކުރު ޓައްޕުތަކެއް ވަގަށް ނެގުމާ ގުޅިގެން ވާދޫ މެޖިސްޓްރޭޓް ކޯޓަށް ހުށަހެޅުނު މައްސަލައަކާ ގުޅިގެންނެވެ. އެމީހާ ރިހާކުރު ޓައްޕުތައް ވަގަށް ނަގާފައިވަނީ، މިއަހަރުގެ އޭޕްރިލްމަހުގެ 21 އަދި 11 ވަނަ ދުވަހުގެ ރޭ މެންދަމުގެ ވަގުތެއްގައި ވަދެގެންނެވެ.

އެ މައްސަލާގައި ދައުވާކޮށްފައިވަނީ ގދ. ވާދޫ، ބަނަފްސާގޭ ހުސައިން ޝަނޫންގެ މައްޗަށެވެ. އޭނާގެ މައްޗަށް ވަނީ ހުއްދަނޫން ތަނަކަށް ވަނުމުގެ ދައުވާ އާއި، ވައްކަންކުރަން ވަނުމުގެ ދައުވާ އުފުލާފައެވެ.

ހުސައިން ވަގަށް ގެންދިޔަ ރިހާކުރު ޓައްޕުތަކުގެ އަގު 4،500 ރުފިޔާއަށް އަރާކަމަށް އެގޭގެ ވެރިފަރާތުން ދިން ބަޔާނުގައި ބުނެފައި ވެއެވެ. ދެ ރޭގެ މަތިން އޭނާ ވަގަށް ގެންގޮސްފައިވަނީ ރިހާކުރު އަޅާފައިހުރި 20 ލީޓަރުގެ ޓައްޕުތަކެވެ.

ވައްކަމުގެ ފުރަތަމަ މައްސަލައާ ގުޅިގެން ކޯޓުން 11 މަހާއި 19 ދުވަހު ޖަލުގައި ބެހެއްޓުމަށް ހުކުމްކުރިއިރު، ދެވަނަ މައްސަލާގައި ވަނީ 3 މަހަށް ޖަލަށްލުމަށް ހުކުމްކޮށްފައެވެ. އަދި ހުއްދަނޫން ތަނަކަށް ވަދެފައިވާތީވެ ވަނީ 22 ދުވަހުގެ ޖަލު ހުކުމެއް އިއްވާފައެވެ.