ދުނިޔޭގެ އެންމެ މޮޅު ކުޅުންތެރިޔާގެ ޝަރަފް ޑެމްބެލޭއަށް. ދެވަނަ ޔަމާލަށް
އެންމެ 18 އަހަރުގެ ހުނަރުވެރި ކުޅުންތެރިޔާ ލަމިން ޔަމާލްއާއި ވާދަކޮށް، ދުނިޔޭގެ އެންމެ މޮޅު ކުޅުންތެރިޔާގެ މަޤާމް ފްރާންސުގެ ފޯވާޑް، އުސްމާން ޑެމްބެލޭ ހޯދައިފިއެވެ.
ފުޓްބޯޅައިގެ ދުނިޔޭގައި ދޭ އެންމެ ޝަރަފުވެރި އެވޯޑް ޑެމްބެލޭ ހޯދައިފައިވަނީ ރޭ ފްރާންސުގެ ވެރިރަށް ޕެރިހުގައި ބޭއްވި ބެލޮންޑިއޯގެ ޚާއްސަ ރަސްމިއްޔާތުގައެވެ.
ޑެމްބެލޭ މި މަގާމު ހޯދީ ޕީއެސްޖީ އާއެކު ޑޮމެސްޓިކް އަދި ޔޫރަޕިއަން މުބާރާތްތައް ކާމިޔާބުކުރި ސީޒަނަކަށް ފަހުގައެވެ. އޭނާގެ ފަހަތުން ބާސެލޯނާގެ 18 އަހަރުގެ ހުނަރުވެރި ޒުވާން ކުޅުންތެރިޔާ ލަމިން ޔަމަލް ދެވަނަ ހޯދިއިރު، ލަމީން އަކީ ދުނިޔޭގެ ތާރީޚުގައި ވެސް ބެލޮންޑިއޯގެ އެންމެ މޮޅު ދެ ކުޅުންތެރިންގެ ތެރޭގައި ހިމެނުނު އެންމެ ހަނގު ކުޅުންތެރިޔާއެވެ.
ދުނިޔޭގެ ދެވަނައަށް އެންމެ މޮޅު ކުޅުންތެރިޔާކަމަށް ލަމީން ހޮވުނުއިރު، އެންމެ މޮޅު ޒުވާން ކުޅުންތެރިޔާގެ ކޯޕާ ޓްރޮފީ ވެސް ރޭ ލަމީން ވަނީ ހޯދާފައެވެ. އެއާއެކު މި އެވޯޑު ދެފަހަރު ހޯދި ފުރަތަމަ ކުޅުންތެރިޔާގެ ގޮތުގައި ލަމީން ވަނީ ވެފައެވެ. އަންހެނުންގެ ބައިން އެންމެ މޮޅު ޒުވާން ކުޅުންތެރިޔާގެ މަގާމު ބާސެލޯނާގެ ވިކީ ލޯޕެޒް ވަނީ ހޯދާފައެވެ.
އެންމެ މޮޅު ޒުވާން ކުޅުންތެރިޔާގެ ކޯޕާ ޓްރޮފީ ލިބުނީ ލަމީންއަށް -- ފޮޓޯ: ރޮއިޓާސް
ލަމީންގެ ފަހަތުން ތިންވަނައަށް ޕީއެސްޖީގެ ވިޓިންހާ އައިިރު، ލިވަޕޫލްގެ މުހައްމަދު ސަލާހު ހަތަރުވަނައަށް އަދި ބާސެލޯނާގެ ރަފިންހާ ވަނީ ފަސްވަނައަށް އައިސްފައިވެއެވެ.
އަންހެނުންގެ ބެލޮންޑިއޯ ބާސެލޯނާގެ އައިޓަނާ ބޮންމަޓީ ވިދިވިދިގެން ދެވަނަ ފަހަރަށް ވަނީ ހޯދައިފައެވެ. މިއީ އޭނާއަށް ބެލޮންޑިއޯ ލިބުނު ތިންވަނަ ފަހަރަށްވާއިރު، އޭނާގެ ފަހަތުން އާސެނަލްގެ މަރިއޯނާ ކަލްޑެންޓޭ އާއި އަލެސިއާ ރުސޯ ދެވަނަ އަދި ތިންވަނައަށް އައިސްފައިވެއެވެ. ބާސެލޯނާގެ އަލެކްސިއާ ޕުޓެއްލަސް ހަތަރުވަނައަށް އައިއިރު، އާސެނަލްގެ ކްލޯއީ ކެލީ ފަސްވަނައަށް އައިސްފައިވެއެވެ.
ގޯލްކީޕަރުންގެ ޔަޝިން ޓްރޮފީ ޕީއެސްޖީގެ ޖަންލުއިޖީ ޑޮނަރުއްމާ ހޯދއިރު، އަންހެނުންގެ ބައިން މި މަގާމު އިނގިރޭސިވިލާތުގެ ހަނާ ހެމްޕްޓަން ވަނީ ހޯދާފައެވެ.
ކޯޗުންގެ ބައިން އެންމެ މޮޅު ކޯޗުގެ މަގާމު ޕީއެސްޖީގެ ލުއިސް އެންރީކެ އާއި އިނގިރޭސި އަންހެނުންގެ ޓީމުގެ ސަރީނާ ވީގްމަން ވަނީ ހޯދާފައެވެ. އަހަރުގެ އެންމެ މޮޅު ޓީމުގެ މަގާމު ފިރިހެނުންގެ ބައިން ޕީއެސްޖީ އަދި އަންހެނުންގެ ބައިން އާސެނަލް ވަނީ ހޯދާފައެވެ.
ޑެމްބެލޭ އަކީ، ޕީއެސްޖީން އެ ކްލަބުގެ ތާރީހުގައި ޔޫރަޕުގެ ޗެމްޕިއަންކަން ފުރަތަމަ ފަހަރަށް، މިދިޔަ ސީޒަނުގައި ހޯދިއިރު އެންމެ މުހިއްމު ދައުރެއް އަދާކުރި ކުޅުންތެރިޔާ އެވެ. އޭނާ ވަނީ އެ ޓީމާ އެކު ފްރާންސް ލީގާއި، ފްރެންޗް ކަޕާއި، ޔުއެފާ ސުޕަ ކާމިޔާބުކޮށް، ފީފާ ކްލަބް ވޯލްޑް ކަޕުގެ ދެ ވަނަ ވެސް ހޯދައިފަ އެވެ. ނިމުނު ސީޒަނުގައި 53 މެޗުން 35 ވެސް އޭނާ ވަނީ ޖަހާފައެވެ.
Advertisement
This content is created and paid for by advertisers and does not involve Voice Journalists
