އައްޑޫސިޓީ ޕޯޓުން ސިއްރިޔާތުގައި ރާއްޖެ އެތެރެކުރަން އުޅުނު 1.8 މިލިއަން ސިނގިރެޓް މޯލްޑިވްސް ކަސްޓަމްސްއިން އަތުލައިގަނެފިއެވެ.

މިކަމާ ގުޅޭގޮތުން ކަސްޓަމްސްއިން މިއަދު ބުނީ، އައްޑޫ ސިޓީ ހިތަދޫ ޕޯޓުން ބަލާފާސްކުރުމުގެ ތެރެއިން 1.8 މިލިއަން ރުފިޔާގެ ސިނގިރޭޓް އަތުލައިގަނެފައިވާކަމަށެވެ. މި ސިނގިރޭޓްތަކުގެ އަގު 15 މިލިއަނެއްހާ ރުފިޔާއަށް އަރާނޭކަމަށް ކަސްޓަމްސްއިން ބުންޏެވެ. މި މައްސަލަ ކަސްޓަމްސްއިން އިތުރަށް ތަހްގީގް ކުރަމުންދާކަމަށްވެސް ކަސްޓަމްސްއިން ވަނީ ބުނެފައެވެ.

ސިނގިރޭޓުން ނަގާ ޑިއުޓީ ބޮޑުކުރުމާއި، އަދި ދުންފަތުގެ ބައެއް އުފެއްދުންތައް ސަރުކާރުން މަނާކުރުމާ ގުޅިގެން މިފަދަ ބާވަތްތަކުގެ ތަކެތި ސިއްރުން ރާއްޖެ އެތެރެކުރުން ނިސްބަތުން އިތުރުވެފައިވާކަން ފާހަގަކުރެވެއެވެ.

އެގޮތުން މިއަހަރުގެ ޖެނުއަރީމަހުގެ ތެރޭގައި ދަ ހޯކްސް ޕްރައިވެޓް ލިމިޓެޑްގެ ފޮރިންގޮއިންގ އުޅަނދެއް ކަމަށްވާ ދަ ހޯކްސް ޖަވާހިރު ބޯޓުން ދިވެހި ރާއްޖެއަށް 200 މާސްޓަރ ކާޓަން މެންޗެސްޓަރ ސިނގިރޭޓް ސިއްރުން އެތެރެކުރި މައްސަލައެއް ވަނީ ފެންމަތިވެފައެވެ. މީގެ އިތުރުން މިއަހަރުގެ އޭޕްރިލްމަހުގެ ތެރޭގައި 13 މިލިއަނަށް ވުރެ ގިނަ ސިނގިރޭޓު ވަގަށް އެތެރެކުރަން އުޅުނު މައްސަލައެއްވެސް ވަނީ ފެންމަތިވެފައެވެ.