ކޮލޮމްބިއާގެ ރައީސް ގުސްޓަވޯ ޕެޓްރޯގެ އެމެރިކާގެ ވިސާ ކެންސަލްކުރުމަށް އެމެރިކާ ސަރުކާރުން ނިންމައިފިއެވެ.

މި ނިންމުން އެމެރިކާގެ ސްޓޭޓް ޑިޕާޓްމެންޓުން ނިންމާފައިވަނީ މިހާރު ކުރިޔަށްދާ އދ.ގެ އާންމު މަޖިލީހުގެ ބައްދަލުވުމުގައި ބައިވެރިވެވަޑައިގަތުމަށް ނިއުޔޯކަށް ކުރައްވަމުންގެންދަވާ ދަތުރުފުޅުގައި، ފަލަސްތީނުގެ ރެލީއެއްގައި ރައީސް ޕެޓްރޯ ދެއްކެވި ވާހަކަތަކާ ގުޅިގެންނެވެ.

އދ. ގެ ޢިމާރާތް ކުރިމަތީގައި ފަލަސްޠީނަށް ތާއީދުކޮށް ބޭއްވި މުޒާހަރާއެއްގައި ބައިވެރިވެވަޑައިގެން ހުންނަވައި، ރައީސް ޕެޓްރޯ ވަނީ އެމެރިކާގެ ސިފައިންނަށް ރައީސް ޓްރަމްޕްގެ އަމުރުތަކަށް ނުކިޔަމަންތެރިވުމަށް ގޮވާލައްވައި، އިންސާނިއްޔަތާ މެދު ވިސްނުމަށް އެދިވަޑައިގަންނަވައިފައެވެ.

އަދި އެމެރިކާގެ ރައީސް ޑޮނާލްޑް ޓްރަމްޕަކީ އެމެރިކާގެ އެހީތެރިކަމާއެކު ނިރުބަވެރި ޔަހޫދީ ދައުލަތް އިޒްރޭލުން ޣައްޒާގައި ޙިންގާ ޤަތުލްޢާންމުގެ ބައިވެރިއެއް ކަމަށް ޕެޓްރޯ ވަނީ ވިދާޅުވެފައެވެ.

މި ވާހަކަތަކާ ގުޅޭގޮތުން އެމެރިކާގެ ސްޓޭޓް ޑިޕާޓްމަންޓުން ވަނީ މިއީ "ބިރުވެރި އަދި ހަމަނުޖެހުން އުފެދޭފަދަ" ވާހަކަތަކެއް ކަމުގައި ބުނެފައެވެ. އަދި އެކަމަާ ގުޅިގެން ރައީސް ޕެޓްރޯގެ ވިސާ ކެންސަލްކުރުމަށް ނިންމާފައިވާކަމަށް ސްޓޭޓް ޑިޕާޓްމެންޓުން ކުރި ޕޯސްޓެއްގައި ބުންޏެވެ.

ޕްރޯ ފަލަސްތީނުގެ ރެލީއެއްގެ އިތުރުން އދގެ އާންމު ޖަލްސާގެ ޕޯޑިއަމްގައި ހުންނަވައިގެން ވެސް ޕެޓްރޯ އިޒްރޭލާއި އެމެރިކާއަށް، ޣައްޒާގެ ޙާލަތާ ގުޅިގެން ގިނައިން ފާޑުކިޔާފައެވެ.

މަޤާމުގައި ހުންނެވި ރައީސެއްގެ ވިސާ ކެންސަލްކުރުމަކީ ވަރަށް މަދުން ހިނގާ ކަމެކެވެ. މިހާރު ވެސް މަސްލަޙަތު ގޯސްވެފައިވާ އެމެރިކާ އަދި ކޮލޮމްބިއާއަށް، މިކަމުގެ ސަބަބުން ދެ ގައުމުގެ ދެމެދުގައި އޮތް ސިޔާސީ އަދި އިޤްތިޞާދީ ގުޅުންތަކަށް އިތުރަށް އަސަރުކުރާނެ ކަމަށް ބެލެވެއެވެ.